O‘zbekiston Jurnalistika va ommaviy kommunikatsiyalar universiteti ijtimoiy tarmoqlarda tarqalgan OTM binosining birida yuzaga kelgan yoriq videosi yuzasidan rasmiy bayonot berdi.
Qayd etilishicha, ushbu 2 santimetr yoriq eski va yangi bino orasidagi chok bo‘lib, universitetning yangi binosini qurish vaqtida yuzaga kelgan. Quruvchilar tilida bu issiq va sovuq ta‘sirida doimiy harakatda bo‘luvchi ikki bino orasidagi chokdir.
“Mutaxassislar tilida bu ‘Temperaturniy shov’ deyiladi. Bu holatning bino cho‘kishiga aloqasi yo‘q. Chunki eski va yangi binolarning poydevori ham boshqa-boshqa”, — deya ta’kidlanadi bayonotda.
OTMga ko‘ra, bino devoridagi yoriq xavfining darajasini tegishli tartibda o‘rganish maqsadida mutaxassislar jalb qilingan.
Qurilish va uy-joy kommunal xo‘jaligi vazirligining ma’lum qilishicha, mazkur holat nazorat inspeksiyasi xodimlari tomonidan o‘rganilmoqda. “To‘liq tafsilotlar haqida tez orada ma‘lumot beramiz”, — deyiladi xabarda.
Avvalroq Qurilish va uy-joy kommunal xo‘jaligi vazirligi tomonidan Andijon viloyatidagi qurilish obyektlarida o‘tkazilgan o‘rganishlar davomida quruvchilar loyihalarda ko‘zda tutilgan talablarga rioya qilmayotgani aniqlangandi.
Izoh (0)