Surxondaryo viloyatida Lacetti ishtirokida yuz bergan yo‘l-transport hodisasi oqibatida ikki kishi halok bo‘ldi. Bu haqda “Hudud” informatsion dasturida ma’lum qilindi.
Qayd etilishicha, 6-aprel kuni Jarqo‘rg‘on tumani “Oqtepa” mahallasi hududidan o‘tuvchi M41 avtomobil yo‘lida Nexia hamda Lacetti avtomobillari ishtirokida YTH sodir bo‘ldi.
O‘rganish davomida aniqlanishicha, Denov—Termiz yo‘nalishida harakatlanib kelayotgan Lacetti haydovchisi tezlikni oshirib, noto‘g‘ri quvib o‘tishni amalga oshirgani sabab qarama-qarshi yo‘nalishda kelayotgan transport vositasi bilan to‘qnashib ketgan.
Hodisa oqibatida Nexia haydovchisi va Lacetti’ning old o‘rindig‘ida bo‘lgan yo‘lovchi voqea joyida vafot etgan. Mashinalar ichida bo‘lgan boshqa yo‘lovchilar og‘ir ahvolda shifoxonaga yotqizilgan.
Eslatib o‘tamiz, 2022-yilning oktabrda ichki ishlar vaziri o‘rinbosari Bekmurod Abdullayev avtomobil yo‘llarining qancha qismi talabga javob bermasligini ma’lum qilgandi. Unga ko‘ra, yanvar—oktabr oylari davomida 7 ming 636 ta yo‘l-transport hodisasi sodir etilgan. Shundan 1 ming 931 tasi o‘lim bilan yakun topgan. Aynan yo‘l infratuzilmasi to‘g‘ri tashkil etilmagani oqibatida 3 ming 980 ta yo‘l-transport hodisasi sodir bo‘lgan. Yo‘llarning talabga javob bermasligi yo‘l-transport hodisalarining 52 foizini tashkil etadi.
Izoh (0)