Ҳиндистон шимолидаги Уттар-Прадеш штати полицияси ўз тўйида қуролдан ўқ узган келинни қидирмоқда. Бу ҳақда BBC хабар берди.
Ижтимоий тармоқларда эълон қилинган видеода турмуш ўртоғи ёнида ўтирган келинчак ўқотар қуролдан ҳавога тўрт марта ўқ узганини кўриш мумкин. Маҳаллий полиция воқеадан сўнг бедарак йўқолган келинга нисбатан иш очган.
Ҳиндистоннинг баъзи шимолий штатларида тўй пайтида тўппончадан ўқ узиш кенг тарқалган ва кўпинча жароҳатлар, ҳатто бахтсиз ҳодисаларга ҳам олиб келади. Мамлакат қонунларига кўра, ўқотар қуролдан “бепарволик, эҳтиётсизлик ёки байрам тадбирида” фойдаланиб, бошқаларни хавф остига қўйган ҳар бир киши қамоқ, жарима ёки иккаласига ҳам ҳукм қилиниши мумкин.
Келиннинг видеосини ижтимоий тармоқларга қариндошлари жойлаган. Полиция аёл ҳибсга олинишидан қўрқиб яширинганини маълум қилди.
2016 йилда Уттар-Прадеш пойтахти Лакхнау суди тўйларда ўқотар қурол қўллаш билан боғлиқ ҳар бир ҳолат, полицияга шикоят қилинган-қилмаганидан қатъи назар, текширилиши керак, деган қарорга келган.
Изоҳ (0)