Afg‘onistonning Parvon viloyatida 22 yoshli qiz majburiy nikoh sababli to‘yi kuni o‘z joniga qasd qildi. Bu haqda Etilaatroz xabar berdi.
Ma’lum qilinishicha, qiz 11-mart kuni mahalliy vaqt bilan soat 18:00 atrofida Kalashnikov avtomatidan o‘ziga o‘q uzgan. Hodisa Shayx Ali tumanidagi Turiy qishlog‘ida sodir bo‘lgan. Mahalliy manba qizning oilasi uni roziligisiz bir erkakka unashtirib qo‘ygani, shuning uchun ham to‘y kuni u o‘z joniga qasd qilganini aytgan.
Majburiy nikoh, oiladagi zo‘ravonlik va ruhiy muammolar Afg‘onistonda ayollarning o‘z joniga qasd qilishining asosiy sabablari sifatida ko‘rilmoqda.
Eslatib o‘tamiz, avvalroq “Tolibon” harakatining rasmiy vakili Afg‘onistonda majburiy nikoh taqiqlanganini ma’lum qilgandi. Taqiq asosida Qunduz viloyatida 50 yoshli erkakning 12 yoshli qizni majburan nikohiga olishiga ruxsat berilmagan. Holat yuzasidan aybdorlar qo‘lga olingan, ular sud jarayonini kutmoqda. “Tolibon” taqiqqa rioya qilmaganlar qonuniy javobgarlikka tortilishini ma’lum qilgan.
Izoh (0)