Eron hukumati so‘nggi paytlarda mamlakat bo‘ylab o‘quvchi qizlarning zaharlanishiga aloqador 110 kishini hibsga oldi. Bu harakatlar qizlarning maktabga borishiga to‘sqinlik qilishga urinish deb taxmin qilinmoqda.
Dastlabki zaharlanish holatlari 2022-yil noyabrda Tehron yaqinidagi Qum shahrida qayd etilgan. O‘shanda 18 nafar o‘quvchi shifoxonaga yetkazilgan. Ulardan biri oyoqlarini his qilmayotganini aytgan, boshqalari nafas qisilishidan shikoyat qilgan. Ayrim ota-onalar farzandlarini maktabga yuborishdan bosh tortgan.
Qum voqealaridan keyin, bir necha hafta ichida shunday holatlar, jumladan Tehron va Borujerd shahrida qayd etilgan bo‘lsa, 2023-yil mart oyi boshidan zaharlanishlar soni keskin oshgan. 6-martga kelib, mamlakatdagi 31 viloyatning 23 tasidan bunday hodisalar haqida xabarlar kelib tushdi.
Hodisalarni o‘rganayotgan hukumat komissiyasi ma’lum qilishicha, 25 viloyatdagi 230 maktabda 5 000 ga yaqin o‘quvchi o‘zini yomon his qilayotgani haqida shikoyat qilgan. Huquq himoyachilari ularning soni 7 000 dan oshiqligini aytmoqda.
Avvalroq The Guardian o‘z manbalariga tayanib, qizlar kuzda hukumatga qarshi bo‘lib o‘tgan namoyishlarda qatnashgani va faol siyosiy pozitsiyasi uchun zaharlanganini yozdi.
Zaharlanish holatlarini davolashga ixtisoslashgan shifokor mavjud dalillarni hisobga olgan holda, “bu zaharlanishning eng ko‘p ehtimoliy sababi kuchsiz fosfororganik modda bo‘lishi mumkin”ligini aytgan. Uning so‘zlariga ko‘ra, zaharlanish sababi “mamlakat ichidagi va tashqarisidagi ekstremistik guruhlar yordamida namoyishchilarni qo‘rqitish” istagi bo‘lgan. “Ular yaqinda bo‘lib o‘tgan norozilik namoyishlarida faol ishtirok etgan o‘quvchi qizlardan o‘ch olmoqchi”, — deb tushuntirdi shifokor.
Eron prezidenti Ibrohim Raisiy yuzlab o‘quvchi qizlarning zaharlanishida Tehron dushmanlarini aybladi.
Izoh (0)