Эроннинг Курдистон вилоятидаги Мираж қизлар мактаби ўқувчилари кимёвий газдан заҳарланди. Бу ҳақда Anadolu агентлиги хабар берди.
Камида 47 нафар ўқувчи қиз жабрланган, улардан 20 нафарининг аҳволи оғир. Эрон расмийлари воқеа юзасидан ҳозирча изоҳ бермади.
Газдан заҳарланган қизларнинг ота-оналари норозлик сифатида мактаб деворидаги Эрон байроғини олиб ташлаган ва олий раҳнамо Али Хоманаийга қарши шиорлар айтган. Гувоҳларнинг сўзларига кўра, мактаб яқинида ҳуқуқ-тартибот кучлари билан тўқнашув юз берган.
Эронда қизлар оммавий заҳарланмоқда
Эронда сўнгги пайтларда мамлакат бўйлаб ўқувчи қизларнинг заҳарланиши ҳолатлари кескин ошган. Бу ҳаракатлар қизларнинг мактабга боришига тўсқинлик қилишга уриниш, деб баҳоланмоқда. Эрон ҳукумати қизларнинг заҳарланишига алоқадор 110 кишини ҳибсга олди.
The Guardian ўз манбаларига таяниб, қизлар кузда ҳукуматга қарши бўлиб ўтган намойишларда қатнашгани ва фаол сиёсий позицияси учун заҳарланганини ёзди.
Заҳарланиш ҳолатларини даволашга ихтисослашган шифокор мавжуд далилларни ҳисобга олган ҳолда, “бу заҳарланишнинг энг кўп эҳтимолий сабаби кучсиз фосфорорганик модда бўлиши мумкин”лигини айтган. Унинг сўзларига кўра, заҳарланиш сабаби “мамлакат ичидаги ва ташқарисидаги экстремистик гуруҳлар ёрдамида намойишчиларни қўрқитиш” истаги бўлган. “Улар яқинда бўлиб ўтган норозилик намойишларида фаол иштирок этган ўқувчи қизлардан ўч олмоқчи”, — деб тушунтирди шифокор.
Эрон президенти Иброҳим Раисий юзлаб ўқувчи қизларнинг заҳарланишида Теҳрон душманларини айблади.
Изоҳ (0)