Estoniyada 2022-yilning 9-mayida tank-yodgorlik yoniga “SSSR” yozuvi tushirilgan futbolka kiyib kelgan erkak jarimaga tortildi.
ERR maʼlumotlariga ko‘ra, mahalliy aholi vakili Narva va Narva-Yiesuu shaharlari o‘rtasida o‘rnatilgan yodgorlik oldiga “SSSR” yozuvi va Sovet Ittifoqi gerbi tushirilgan qizil futbolkada kelgan. Sud 9-may kuni bunday kiyimlarning namoyish etilishini xalqaro jinoyatni oqlash bilan bog‘liq provokatsiya deb atadi.
Bundan tashqari, sud majlisida erkak Rossiyaning Ukrainaga qarshi harbiy agressiyasini qo‘llab-quvvatlashini aytgan. U 444 yevro miqdorida jarimaga tortildi.
Estoniyada urushni qo‘llab-quvvatlaganlik uchun jazolar
2022-yilning yozida rossiyalik erkak Tallin rus armiyasi tomonidan “ikki soatda” bosib olinishi mumkinligi haqida video e’lon qilgan edi. U nafrat qo‘zg‘ash va xalqaro jinoyatni oqlashda ayblanib, hibsga olingan.
Avgust oyida estoniyalik fuqaro Ukraina bayrog‘iga oyog‘ini artgani uchun uch oylik qamoq jazosiga hukm qilingan edi. Kuzda esa sud Ukrainaning davlat bayrog‘ini yerga uloqtirib, uni yoqib yuborgan erkakni shartli qamoq jazosiga hukm qildi.
Shuningdek, Estoniyada Rossiya armiyasi hisobiga 40 yevro o‘tkazgan ayol sudlandi.
Izoh (0)