“Ulardan o‘ch olishgan”. Erondagi namoyishlarda qatnashgan o‘quvchi qizlarning ommaviy zaharlanishi tergov qilinmoqda

Eronda 2022-yilning kuzida hukumatga qarshi bo‘lib o‘tgan namoyishlarda qatnashgan o‘quvchi qizlarning zaharlanishi bo‘yicha tergov boshlandi. The Guardian o‘z manbalariga tayanib yozishicha, qizlar faol siyosiy pozitsiyasi uchun o‘ch olish maqsadida zaharlangan.

“Qum shahrida bir necha talaba qiz zaharlanganidan keyin ma’lum bo‘ldiki, ayrim kishilar barcha maktablar, ayniqsa, qizlar maktablarining yopilishini xohlamoqda”, — deya nashr Eron ta’lim vaziri o‘rinbosari Yunes Panahiyning so‘zlaridan iqtibos keltirgan.

Uning qo‘shimcha qilishicha, “o‘quvchi qizlarni zaharlashda qo‘llanilgan kimyoviy moddalar harbiy kimyoviy moddalar bo‘lmagan”.

Parlamentning sog‘liqni saqlash komissiyasi a’zosi doktor Homayun Samiyah Najafobodiy “Qum va Borujerd kabi shaharlarda o‘quvchi qizlarning zaharlanishi ataylab qilingan”ini tasdiqladi.

Zaharlanish holatlarini davolashga ixtisoslashgan shifokor The Guardian nashriga ismini oshkor qilmaslik sharti bilan aytishicha, mavjud dalillarni hisobga olgan holda, “bu zaharlanishning eng ko‘p ehtimoliy sababi kuchsiz fosfororganik modda bo‘lishi mumkin”.

Shifokorning so‘zlariga ko‘ra, zaharlanish sababi “mamlakat ichidagi va tashqarisidagi ekstremistik guruhlar yordamida namoyishchilarni qo‘rqitish” istagi bo‘lgan.

“Ular yaqinda bo‘lib o‘tgan norozilik namoyishlarida faol ishtirok etgan o‘quvchi qizlardan o‘ch olmoqchi”, — deya tushuntirdi shifokor.

Nashrning yozishicha, zaharlanish holatlari ko‘plab qizlarning maktabga bormay qo‘yishiga olib kelgan. Qumlik o‘qituvchining aytishicha, hozirda 250 nafar o‘quvchidan atigi 50 nafari darsga qatnashmoqda. O‘tgan hafta zaharlangan qizlarning ota-onalari shahar hokimligi oldida norozilik namoyishi o‘tkazgan, bir qancha maktablar yopilgan.

Eronda ommaviy norozilik namoyishlari o‘tgan yil sentabr oyi o‘rtalarida boshlandi va deyarli uch oy davom etdi. Yakunda ayollar endilikda, de-fakto, yirik shaharlarda hijob kiyishning qattiq majburiyatiga rioya qilmasligi mumkin bo‘ldi. Xavfsizlik kuchlari tomonidan namoyishlarning shafqatsiz bostirilishi oqibatida bir necha yuz kishi halok bo‘ldi, qatl qilindi, 10 mingdan ortiq kishi hibsga olindi. Hozirda hibsga olinganlarning aksariyati ozod qilingan.