O‘zbekistonning uch viloyatida gaz va svetdan noqonuniy foydalanganlar qariyb 352 mln so‘m zarar yetkazdi

O‘zbekistonning uch viloyatida: Qashqadaryo, Buxoro, Samarqandda gaz va svetdan noqonuniy foydalanganlar qariyb 352 million so‘m zarar yetkazdi. Bu haqda Iqtisodiy jinoyatlarga qarshi kurashish departamenti axborot xizmati xabar berdi. 

Xabarga ko‘ra, Bosh prokuratura huzuridagi departamentning Qarshi shahar bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda, “Q.C.” MCHJ rahbari M.O. va boshqalar “N.” MFYdagi ko‘p qavatli uyga o‘rnatilgan suv nasoslari va boshqa jihozlarni hech qanday hujjatsiz tarmoqqa ulab, 454,3 ming kVt/s elektr energiyasidan noqonuniy foydalangani aniqlangan. 

Departamentning Buxoro shahar bo‘limi tomonidan IIB va ETK xodimlari bilan hamkorlikda o‘tkazilgan tezkor tadbirda esa, Beruniy ko‘chasidagi xonadonda yashovchi N.Yu. uyi yerto‘lasida 4 ta to‘plamdagi mayning kripto-aktivlari qurilmalarini umumiy foydalanishdagi elektr tarmog‘iga o‘zboshimchalik bilan ulab, 63,5 ming kVt/s elektr energiyasidan noqonuniy foydalangani aniqlangan. 

Shu kabi, departamentning Oqdaryo, Past Darg‘om va Urgut tuman bo‘limlari tomonidan o‘tkazilgan tergovga qadar tekshiruvlarda, Oqdaryo tumanidagi “A.S.” MCHJga qarashli oshxonada korxona ish yurituvchisi gaz plita va isitish qozonini gaz tarmog‘iga o‘zboshimchalik bilan ulagani, Past Darg‘om tumanidagi qurilish ishlarini olib borayotgan “Q.S.” MCHJ hamda Urgut tumanidagi “U.K.” MCHJ tomonidan elektr tarmoqlariga noqonuniy ulanish holatlari aniqlangan.  

Ushbu qonunbuzilish holatlari oqibatida davlat va jamiyat manfaatlariga 351,9 million so‘m zarar yetkazilgan.

Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.