Ўзбекистоннинг уч вилоятида газ ва светдан ноқонуний фойдаланганлар қарийб 352 млн сўм зарар етказди

Ўзбекистоннинг уч вилоятида: Қашқадарё, Бухоро, Самарқандда газ ва светдан ноқонуний фойдаланганлар қарийб 352 миллион сўм зарар етказди. Бу ҳақда Иқтисодий жиноятларга қарши курашиш департаменти ахборот хизмати хабар берди. 

Хабарга кўра, Бош прокуратура ҳузуридаги департаментнинг Қарши шаҳар бўлими томонидан ЭТК ходимлари билан ҳамкорликда ўтказилган терговга қадар текширувда, “Қ.C.” МЧЖ раҳбари М.О. ва бошқалар “Н.” МФЙдаги кўп қаватли уйга ўрнатилган сув насослари ва бошқа жиҳозларни ҳеч қандай ҳужжатсиз тармоққа улаб, 454,3 минг кВт/с электр энергиясидан ноқонуний фойдалангани аниқланган. 

Департаментнинг Бухоро шаҳар бўлими томонидан ИИБ ва ЭТК ходимлари билан ҳамкорликда ўтказилган тезкор тадбирда эса, Беруний кўчасидаги хонадонда яшовчи Н.Ю. уйи ертўласида 4 та тўпламдаги майнинг крипто-активлари қурилмаларини умумий фойдаланишдаги электр тармоғига ўзбошимчалик билан улаб, 63,5 минг кВт/с электр энергиясидан ноқонуний фойдалангани аниқланган. 

Шу каби, департаментнинг Оқдарё, Паст Дарғом ва Ургут туман бўлимлари томонидан ўтказилган терговга қадар текширувларда, Оқдарё туманидаги “А.С.” МЧЖга қарашли ошхонада корхона иш юритувчиси газ плита ва иситиш қозонини газ тармоғига ўзбошимчалик билан улагани, Паст Дарғом туманидаги қурилиш ишларини олиб бораётган “Қ.С.” МЧЖ ҳамда Ургут туманидаги “У.К.” МЧЖ томонидан электр тармоқларига ноқонуний уланиш ҳолатлари аниқланган.  

Ушбу қонунбузилиш ҳолатлари оқибатида давлат ва жамият манфаатларига 351,9 миллион сўм зарар етказилган.

Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.