Qashqadaryo viloyati Maktabgacha va maktab taʼlimi boshqarmasi “Dehqonobod tumani maktabgacha va maktab taʼlimi bo‘limi tomonidan xodimlariga g‘ayriqonuniy topshiriq berilmoqda”, mazmunidagi murojaatga munosabat bildirib, holat nazoratga olinganini maʼlum qildi.
“Daryo” viloyat Maktabgacha va maktab taʼlimi boshqarmasi axborot xizmati rahbari Javohir Rustamov bilan bog‘lanib, bo‘lim boshlig‘ining g‘ayriqonuniy topshirig‘i haqida so‘radi.
“Bu murojaat hali ijtimoiy tarmoqlarda eʼlon qilinmagan. Kobul Dusov va bir nechta murojaatlar boshqarmaga murojaat qilib, bo‘lim boshlig‘i maktab direktorlaridan iborat rahbariyatga ishga qachon kelgani va ketganini bilish uchun rahbariyatning ishga borgan payti va ishdan qaytayotgan paytini bilish uchun fotosurat taqdim qilishini so‘ragan. Shu sabab mazkur holat nazoratga olinib, bo‘lim boshlig‘iga bundayin topshiriq bermaslik to‘g‘risidagi tushuntirildi”, — deydi Javohir Rustamov.
Qashqadaryo viloyati Maktabgacha va maktab taʼlimi boshqarmasi boshlig‘i Ubaydulla Oripov “Daryo” jurnalisti bilan suhbatida bo‘lim boshlig‘i bilan gaplashib, nega bunday topshiriq bergani haqida so‘raganini bildirdi.
“Bo‘lim boshlig‘i yangi tayinlangani bois, tuman markazidan chekka hududlardagi maktablardagi holatni tartibga solish uchun maktab rahbariyatidan iborat jamoaga — maktab direktori, o‘rinbosarlari va boshqa masʼullarga ishga o‘z vaqtida kelib, ish paytida maktabda bo‘lishi kerakligini tayinlagan va buni isbotlovchi fotosuratlar so‘ragan. Bo‘lim boshlig‘ining maktab rahbariyatidan masʼuliyat talab qilishi to‘g‘ri va asosli. Biroq buni boshqacha usulda nazorat qilishi lozimligini tushuntirdik”, — deydi viloyat maktabgacha va maktab taʼlimi boshqarmasi boshlig‘i Ubaydulla Oripov.
Dehqonobod tuman maktabgacha va maktab taʼlimi bo‘limi boshlig‘i Xoliyor Mengliyev ham bunday topshiriq berishiga asosi borligini, maktablardagi holat nazoratdan chiqib ketganini aytmoqda.
“Yangi ish boshlaganimdan so‘ng imkon qadar chekka hududlarda bo‘lib, taʼlim sifati, rahbarlar masʼuliyatini o‘rganishga harakat qilyapman. Kuzatuvlarimdan maʼlum bo‘lishicha, chekka hududlardagi aksariyat maktablarda rahbariyat o‘z vaqtida ishga kelmasligi, ish vaqti tugamasdan maktabdan ketib qolish holatlari ko‘paygan. Bu esa maktabda nazorat susayishiga, o‘qituvchilarning ham o‘z vaqtida maktabga kelib-ketishi izdan chiqqanini ko‘rsatdi. Shuni tartibga olish maqsadida maktab rahbariyatiga ishga kelgan payti va ketish vaqtida fotosuratga tushib, menga yuborishlarini so‘ragandim. Bundan ko‘zlangan maqsad faqatgina barcha rahbariyatning o‘z vaqtida maktabga kelib, o‘z vaqtida ketishiga erishish edi. Bilasiz, bir inson bir vaqtning o‘zida barcha tumandagi maktablarni nazorat qilolmaydi. Qolaversa, Dehqonobod tumanidagi maktablar tuman markazidan 200-250 kilometr uzoqlikda joylashgan. Ushbu maktablarda ham tartib va nazorat bo‘lishini taʼminlash maqsadida shunday ishga qo‘l urilgan. Bu maktab rahbarlariga malol kelsa, unda nazorat qilishning ularga maʼqul yo‘lini izlaymiz. Lekin baribir tartib va intizomni nazoratga olmasak bo‘lmaydi. Zeʼro yoshlarning sifatli taʼlim olishi men va mening jamoam yelkasiga yuklatilgan masʼuliyat. Buni vijdonan ado etishim, olayotgan maoshimni halolab olishim kerak”, — deydi maktab rahbariyatiga g‘ayriqonuniy topshiriq bergani aytilgan masʼul.
Izoh (0)