Malayziya kompaniyasi bilan avtomobilsozlik sohasida qo‘shma loyihani amalga oshirish bo‘yicha kelishuvga erishildi.
Xabarga ko‘ra, O‘zbekiston elchixonasi xodimlari Malayziyaning Amtel Holdings Bhd kompaniyasi ijrochi direktori Lim Xun Teyk bilan muzokaralar o‘tkazdi. Uchrashuv avvalida Malayziya tomoni kompaniya ishlab chiqaradigan avtomobil kameralari, navigatsiya tizimlari va elektromobillarni quvvatlash stansiyalari to‘g‘risida taqdimot o‘tkazdi.
Malayziya tomoniga O‘zbekistonda olib borilayotgan iqtisodiy islohotlar, shu jumladan “O‘zavtosanoat” AJ va uning tarkibidagi korxonalar, ishlab chiqariladigan avtomobillar turlari va hajmlari, mamlakatda elektromobillarni ishlab chiqarish imkoniyatlari va avtomobilsozlik sohasida investorlar uchun yaratilgan imkoniyatlar to‘g‘risida batafsil maʼlumot berildi.
Qayd etilishicha, tadbir davomida xorij tomoni bilan mamlakatda avtomobilsozlik sohasida ehtiyot qismlar va avtomobil aksessuarlarini ishlab chiqarish bo‘yicha qo‘shma loyihalarni amalga oshirish masalalari va elektromobillarni quvvatlash stansiyalari tarmoqlarini qurish imkoniyatlari muhokama qilindi.
Muzokaralar natijasida Amtel Holdings Bhd kompaniyasi vakillarining 27—28-aprel kunlari bo‘lib o‘tadigan II Toshkent xalqaro investitsiya forumiga ishtirok etish maqsadida mamlakatga amaliy safarini tashkil etish to‘g‘risida kelishuvga erishildi. Safar davomida Malayziya tomoni “O‘zavtosanoat” AJ va uning tarkibidagi korxonalar rahbariyati bilan avtomobilsozlik sohasida qo‘shma investitsiya loyihalarini amalga oshirish imkoniyatlarini o‘rganish va hamkorlik istiqbollarini muhokama qilish uchun uchrashuvlar o‘tkazishi rejalashtirilgan.
Maʼlumot berilishicha, Amtel Holdings Bhd kompaniyasi 1993-yilda tashkil etilgan. Korxonaning asosiy faoliyat turi GPS navigatsiya tizimlari uchun dasturiy taʼminotlar ishlab chiqarish va ularni yig‘ishdan iborat. Shunindek, ushbu kompaniya Malayziyada elektromobillar uchun quvvatlash stansiyalarini qurish bo‘yicha katta tajribaga ega.
Izoh (0)