“Holat yuzasidan ko‘rsatma berishdan bosh tortdi”. Toshkent shahar sudlari Activist blogeri haqida

Activist nomi bilan tanilgan bloger Hojiakbar Nosirov 5-aprel kuni yogurtlar harom ekani to‘g‘risidagi videoni ijtimoiy tarmoqqa joylashtirgani ortidan 15 sutkaga qamalgani haqida xabar berilgan edi. Toshkent shahar sudlari bloger ishi bo‘yicha qo‘shimcha maʼlumot berdi. 

Unga ko‘ra, 8-aprel kuni jinoyat ishlari bo‘yicha Shayxontohur tuman sudida Maʼmuriy javobgarlik to‘g‘risidagi kodeksning 184-3-moddasi (milliy, irqiy, etnik yoki diniy adovatni targ‘ib qiluvchi materiallarni tayyorlash, saqlash yoki tarqatish) va 194-moddasi (ichki ishlar organlari xodimining qonuniy talablarini bajarmaslik) 1-qismi bo‘yicha unga nisbatan yuritilgan maʼmuriy ish ko‘rib chiqildi.

Shayxontohur tumani Ichki ishlar organlari faoliyatini muvofiqlashtirish bo‘limi TQKB xodimlari tomonidan Toshkent shahrida diniy muhitni sog‘lomlashtirish borasida olib borilayotgan ijtimoiy tarmoqlarda monitoring tadbirlari davomida, u o‘ziga tegishli bo‘lgan Activist kanali orqali har xil turdagi diniy mazmundagi videolarni, yaʼni Din ishlari bo‘yicha qo‘mitaning 2023-yil 7-apreldagi xulosasiga asosan aholi orasida turli ixtilof va tushunmovchiliklar keltirib chiqarishi mumkin bo‘lgan g‘oyalarni tarqatgani aniqlangan.

Bundan tashqari, ish hujjatlariga ko‘ra, bloger IIO xodimlarining hujjatlarini tekshirish uchun taqdim etish, tushuntirish berish va ish hujjatlari bilan tanishib chiqish kabi qonuniy talablarga bo‘ysunmagan. Sud majlisida huquqbuzar tariqasida so‘roq qilish uchun unga so‘z berilganida huquqbuzar va uning himoyachisi holat yuzasidan ko‘rsatma berishdan bosh tortdi.

U ko‘rsatma berishdan bosh tortgan bo‘lsa-da, uning yuqoridagi huquqbuzarliklarni sodir etgani ish hujjatlaridagi IIO FMB xodimining bildirgisi, dalolatnoma, ko‘zdan kechirish va elektron materiallarni olish bayonnomasi, Activist kanalidan olingan fotolavhalar, DVD-R diskidagi videolavhalar, ashyoviy dalillarni olish bayonnomasi, hamda Din ishlari bo‘yicha qo‘mitaning ekspertlik xulosasi va boshqa dalillar bilan o‘z tasdig‘ini topdi.

Sudning qarori bilan X.N. Maʼmuriy javobgarlik to‘g‘risidagi kodeksning 184-3-moddasi va 194-moddasi 1-qismida tutilgan huquqbuzarlikni sodir etganlikda aybli deb topilib, unga 15 sutka maʼmuriy qamoq jazosi tayinlandi.

Qayd etilishicha, ushbu qaror ustidan qonunchilikda belgilangan tartib va muddatlarda Toshkent shahar sudiga apellyatsiya shikoyati yoki protest berilishi mumkin.