Qashqadaryo viloyatining Dehqonobod tumanida loyiha qiymati 66 milliard 706 million so‘m bo‘lgan sel suv ombori foydalanishga topshirildi. Bu haqda “Daryo”ga tuman hokimligi axborot xizmati xabar berdi.
Maʼlum bo‘lishicha, sel suv ombori ochilishida viloyat hokimi Murodjon Azimov, sektor rahbarlari, viloyat faollari va aholi ishtirok etgan.
Tadbirda maʼlum qilinishicha, Dehqonobod sel suv ombori 1982-yilda qurib foydalanishga topshirilgan bo‘lib, loyihaviy hajmi 15,4 million metr kub suv yig‘ishga mo‘ljallangan.
Mazkur sel suv ombori uzoq yillar davomida foydalanilishi natijasida suv omborga loyqa va cho‘kindilar yig‘ilib, foydali suv hajmi 12,4 million metr kubga kamayib, atigi 3 million metr kubni tashkil qilib qolgan.
“Ushbu sel suv omborining qurilishi Dehqonobod tumanidagi eng dolzarb masalalardan biri bo‘lib, tumandagi 29 ming gektar aholi tomorqa maydonlari va 1,6 ming gektar maydonlarda suv taʼminoti uchun juda zarur hisoblangan.
Shunga asosan, Vazirlar Mahkamasining qator topshiriqlari asosida respublika budjetining 66 milliard 706 million so‘m mablag‘ ajratilib, 2017—2022-yillarda sel suv ombori hajmi 20 million metr kubga yetkazish bo‘yicha qurilish ishlari olib borildi.
2020—2022-yillarda prezidentning Qashqadaryo viloyatiga tashriflari davomida ham agrar sohada ushbu dolzarb masala ko‘tarilib, barcha imkoniyatlarni ishga solib, ushbu suv omborni qurish ishlari jadallashtirish, aholi farovonligi va oziq-ovqat xavfsizligi taʼminlash maqsadida joriy yilda suv omborning qurilish ishlarini yakunlash bo‘yicha alohida topshiriq berilgan edi”, — deydi tuman hokimi Zoir Aliqulov.
Tadbir davomida tuya va ho‘kiz so‘yilib, aholiga ehson qilingan. Keksa otaxon va onaxonlarga maxsus ramazon tuhfasi tarqatilgan.
Qo‘shimcha qilinishicha, qurilish ishlari “Qashqadaryosuvqurilishinvest” davlat muassasasi buyurtmachiligida pudratchi korxona “Yakkabog‘ qo‘rg‘oni” qurilish injinering kompaniyasi tomonidan olib borilgan.
Izoh (0)