Rossiya armiyasi tarkibida “Z-shturmchi rotalari” tashkil etilmoqda, ular shahar hududida olib boriladigan janglarga tashlanishi mumkin. Bu haqda Amerika urushni o‘rganish institutining (ISW) yangi hisobotida aytiladi.
ISW hisobotida o‘zini Ukrainaning zahiradagi ofitseri deb atagan anonim twitter foydalanuvchisi Tatarigami_UA tomonidan yozilgan tred keltirilgan . U “Z-shturmchi rotalari to‘g‘risidagi nizom” nomli hujjatning suratlarini chop etgan, ammo ushbu hujjatni qanday qo‘lga kiritganini aytmagan.
Hujjatga ko‘ra, rotalar anneksiya qilingan Donetsk xalq respublikasining 8-qo‘shma qurolli armiyasi (Janubiy harbiy okrug) va 1-armiya korpusi bo‘linmalari tarkibida tashkil etilmoqda. Har bir rota zahiradagi askarlardan tuzilgan bo‘lishi, shaharlarda yoki “geografik jihatdan qiyin hududlarda” jangovar harakatlarni, masalan, istehkomlar va qo‘mondonlik punktlari yoki aloqa markazlari kabi muhim strategik obyektlarni qo‘lga kiritish uchun jang qilishga mo‘ljallangan bo‘lishi mumkin.
Har bir rota 100 nafar harbiydan iborat. Uning tarkibida to‘rtta “qo‘lga olish otryadi” (har biri 10 kishidan iborat), to‘rtta o‘t ochishga ko‘maklashish otryadi (har biri 10 kishidan iborat), besh kishilik jangovar muhandislik guruhi, sakkiz kishilik razvedka guruhi, uch kishilik tibbiy guruh, ikki kishidan iborat dron ekipaji, ikki kishilik qo‘mondonlik shtabi bo‘ladi. Ukrainalik ofitserning so‘zlariga ko‘ra, hujum rotalari shaxsiy tarkibi 10–15 kun ichida o‘qitilishi kerak. “Bu murakkab jangovar missiyalarga shaxsiy tarkibni yetarli darajada tayyorlash uchun hayratlanarli darajada qisqa muddat”, — deb baholadi ISW.
ISW taxminicha, ushbu rotalar Donetsk front chizig‘i bo‘ylab harakatlanadi, u yerda Janubiy harbiy okrug bo‘linmalari “doimiy muvaffaqiyatsiz hujum operatsiyalarida” faol ishtirok etmoqda. Tahlilchilarning fikricha, bunday otryadlarni yaratish orqali Rossiya qo‘mondonligi bu sohada “arzimas taktik muvaffaqiyatlar”ni rivojlantirishga harakat qilayotgan bo‘lishi mumkin. ISW ma’lumotlariga ko‘ra, “ushbu tuzilmalardan foydalanish Rossiyaning mazkur front chizig‘idagi kuchlariga hujumda sezilarli ustunlik berishi dargumon”.
Izoh (0)