AQSH, Germaniya va Vengriya NATOning yozgi sammitida Ukrainaga alyansga qo‘shilish bo‘yicha “yo‘l xaritasi”ni taklif qilishga qarshi chiqdi, deb yozmoqda Financial Times o‘z manbalariga tayanib.
Nashrning yozishicha, alyansdagi kelishmovchiliklar aprel oyi boshida NATO tashqi ishlar vazirlarining Bryusseldagi yig‘ilishida yuzaga kelgan. Ushbu tadbirda alyans a’zolari sammit yakunida Ukrainaga nima taklif qilish kerakligi haqida kelishib olishga uringan.
Alyansning barcha a’zolari Rossiyaning keng ko‘lamli bosqinchiligi davom etayotgan bir paytda Ukrainaning NATOga kirishini jiddiy muhokama qilishning iloji yo‘q, degan umumiy fikrda. Shunga qaramay, nashrning uchrashuvlarda qatnashgan ikki manbasi aytishicha, NATOda navbatdagi sammitda Ukrainaga alyansga a’zo bo‘lish uchun “siyosiy yo‘l” taklif qilish tarafdorlari ko‘payib bormoqda.
Hozirda mavjud NATO—Ukraina komissiyasini NATO—Ukraina kengashiga aylantirish imkoniyati ham muhokama qilinmoqda, bu Ukrainaning alyans hamkori maqomini oshiradi, deya qayd etdi gazeta.
Bu takliflarga jumladan AQSH qarshi chiqqan. BBC rus xizmatiga ko‘ra, bu Vashingtonning urush davrida Kiyev va alyans aloqalarining chuqurlashishi Rossiya bilan mojaroning kuchayishiga olib kelishi haqidagi xavotirlari bilan bog‘liq.
AQSH ittifoqdoshlariga Ukraina urushda g‘alaba qozonish uchun hozircha Kiyevga qisqa muddatli harbiy, moliyaviy va gumanitar yordam ko‘rsatishga e’tibor qaratishni taklif qilmoqda, deydi FT manbalari. AQSH rasmiylarining aytishicha, Vilnyusdagi sammitda Ukrainaga amaliy yordam, masalan, o‘q-dorilar masalasi muhokama qilishini kerak, urushdan keyingi ehtimoliy siyosiy aloqalar haqidagi munozaralar esa bu maqsadga putur yetkazadi.
Ukraina 2022-yil sentabrda, Rossiya Ukraina hududlarini anneksiya qilganidan so‘ng, NATOga a’zo bo‘lish uchun rasmiy ariza topshirgan edi. 2023-yil mart oyida Kiyev NATOning iyul oyida Vilnyusda bo‘lib o‘tadigan sammitiga rasmiy taklif oldi. Ushbu voqeani sharhlar ekan, Ukraina prezidenti Vladimir Zelenskiy sammitdan mamlakat uchun uzoq muddatli xavfsizlik kafolatlarini kutayotganini aytdi.
Izoh (0)