Moskva markazida to‘pponcha bilan qurollangan shaxs Rossiya Mudofaa vazirligining bosh binosiga kirishga urindi, deb xabar bermoqda “TASS” va yana qator Rossiya OAVlari.
Hodisa Frunzenskaya sohilida joylashgan Mudofaa vazirligi binosi yaqinidagi nazorat-o‘tkazish punktida sodir bo‘lgan. “Vazirlik hududiga qurol ko‘targan noadekvat holatdagi erkak kirishga urindi. Shu bilan birga u baland ovozda baqirib, qo‘llarini silkitdi. Qoidabuzar zudlik bilan hibsga olindi, u qilmishi sababini tushuntirib berolmadi”, — dedi “TASS” suhbatdoshi.
Hodisa oqibatida hech kim jabrlanmagan. Qo‘lga olingan shaxsga nisbatan mayda bezorilik moddasi bo‘yicha bayonnoma tuzildi. U psixiatriya bo‘limiga tekshiruvga yuborildi. Dastlabki ma’lumotlarga ko‘ra, qoidabuzardan olib qo‘yilgan qurol — pnevmatik to‘pponcha.
“112” Telegram kanali xabariga ko‘ra, qo‘lga olingan shaxs Yaroslavl viloyatida yashovchi 40 yoshli Dmitriy Buman. Boshqa xabarga ko‘ra, u viloyatning Ribinsk shahri uy-joy mulkdorlari shirkati raisi.
Moskva rasmiylari va Rossiya Mudofaa vazirligi hodisaga izoh bermadi.
Izoh (0)