Россия армияси таркибида “Z-штурмчи роталари” ташкил этилмоқда, улар шаҳар ҳудудида олиб бориладиган жангларга ташланиши мумкин. Бу ҳақда Америка урушни ўрганиш институтининг (ISW) янги ҳисоботида айтилади.
ISW ҳисоботида ўзини Украинанинг заҳирадаги офицери деб атаган аноним Twitter фойдаланувчиси Татаригами_УА томонидан ёзилган тред келтирилган . У “З-штурмчи роталари тўғрисидаги низом” номли ҳужжатнинг суратларини чоп этган, аммо ушбу ҳужжатни қандай қўлга киритганини айтмаган.
Ҳужжатга кўра, роталар аннексия қилинган Донецк халқ республикасининг 8-қўшма қуролли армияси (Жанубий ҳарбий округ) ва 1-армия корпуси бўлинмалари таркибида ташкил этилмоқда. Ҳар бир рота заҳирадаги аскарлардан тузилган бўлиши, шаҳарларда ёки “географик жиҳатдан қийин ҳудудларда” жанговар ҳаракатларни, масалан, истеҳкомлар ва қўмондонлик пунктлари ёки алоқа марказлари каби муҳим стратегик объектларни қўлга киритиш учун жанг қилишга мўлжалланган бўлиши мумкин.
Ҳар бир рота 100 нафар ҳарбийдан иборат. Унинг таркибида тўртта “қўлга олиш отряди” (ҳар бири 10 кишидан иборат), тўртта ўт очишга кўмаклашиш отряди (ҳар бири 10 кишидан иборат), беш кишилик жанговар муҳандислик гуруҳи, саккиз кишилик разведка гуруҳи, уч кишилик тиббий гуруҳ, икки кишидан иборат дрон экипажи, икки кишилик қўмондонлик штаби бўлади. Украиналик офицернинг сўзларига кўра, ҳужум роталари шахсий таркиби 10–15 кун ичида ўқитилиши керак. “Бу мураккаб жанговар миссияларга шахсий таркибни етарли даражада тайёрлаш учун ҳайратланарли даражада қисқа муддат”, — деб баҳолади ISW.
ISW тахминича, ушбу роталар Донецк фронт чизиғи бўйлаб ҳаракатланади, у ерда Жанубий ҳарбий округ бўлинмалари “доимий муваффақиятсиз ҳужум операцияларида” фаол иштирок этмоқда. Таҳлилчиларнинг фикрича, бундай отрядларни яратиш орқали Россия қўмондонлиги бу соҳада “арзимас тактик муваффақиятлар”ни ривожлантиришга ҳаракат қилаётган бўлиши мумкин. ISW маълумотларига кўра, “ушбу тузилмалардан фойдаланиш Россиянинг мазкур фронт чизиғидаги кучларига ҳужумда сезиларли устунлик бериши даргумон”.
Изоҳ (0)