Finlyandiya bosh vaziri Sanna Marin mamlakat prezidenti Sauli Niinistyodan amaldagi hukumatni iste’foga chiqarishni so‘radi. Uning so‘rovi qabul qilindi, deb xabar bermoqda Yle News.
Marin rahbarligidagi hukumat yangi hukumat tayinlanmaguncha ishlashda davom etadi.
Parlament saylovlarida g‘alaba qozongan Milliy koalitsiya rahbari Petteri Orpo kelasi hafta yangi hukumatni shakllantirish bo‘yicha maslahatlashuvlarni boshlashi kutilmoqda.
2-aprel kuni Finlyandiyada parlament saylovlari bo‘lib o‘tdi. Ularning natijalariga ko‘ra, Sanna Marin boshchiligidagi Sotsial-demokratik partiya kichik farq bilan uchinchi o‘rinni egalladi. Marinning o‘zi tez orada partiya raisi lavozimini tark etishini e’lon qildi.
Marin 2019-yilda bosh vazir va SDP rahbari bo‘lgan. Uning ushbu lavozimda ishlagan davrida koronavirus pandemiyasi va Rossiyaning Ukrainaga bosqini boshlandi, buning fonida Finlyandiya neytral maqomini tark etib, NATOga qo‘shildi.
Izoh (0)