Финляндия бош вазири Санна Марин мамлакат президенти Саули Ниинистёдан амалдаги ҳукуматни истеъфога чиқаришни сўради. Унинг сўрови қабул қилинди, деб хабар бермоқда Yle News.
Марин раҳбарлигидаги ҳукумат янги ҳукумат тайинланмагунча ишлашда давом этади.
Парламент сайловларида ғалаба қозонган Миллий коалиция раҳбари Петтери Орпо келаси ҳафта янги ҳукуматни шакллантириш бўйича маслаҳатлашувларни бошлаши кутилмоқда.
2 апрель куни Финляндияда парламент сайловлари бўлиб ўтди. Уларнинг натижаларига кўра, Санна Марин бошчилигидаги Социал-демократик партия кичик фарқ билан учинчи ўринни эгаллади. Мариннинг ўзи тез орада партия раиси лавозимини тарк этишини эълон қилди.
Марин 2019 йилда бош вазир ва СДП раҳбари бўлган. Унинг ушбу лавозимда ишлаган даврида коронавирус пандемияси ва Россиянинг Украинага босқини бошланди, бунинг фонида Финляндия нейтрал мақомини тарк этиб, НАТОга қўшилди.
Изоҳ (0)