Ukraina Rossiya tomonidan anneksiya qilingan Qrimning kelajagi bo‘yicha Ukraina armiyasining muvaffaqiyatli qarshi hujumidan keyingina Rossiya bilan muzokaralar olib borishi mumkin. Ukraina armiyasining qarshi hujumi aprel-may oylarida boshlanishi mumkinligi aytilgandi.
“Agar biz jang maydonida strategik maqsadlarimizga erisha olsak va Qrim bilan maʼmuriy chegaraga yetib borsak, bu masalani muhokama qilish uchun diplomatik sahifa ochishga tayyormiz”, — dedi Ukraina prezidenti Vladimir Zelenskiy ofisi rahbari xalqaro masalalar bo‘yicha o‘rinbosari Andrey Sibiga Britaniyaning Financial Times gazetasiga. Biroq uning so‘zlariga ko‘ra, bu Qrimni harbiy yo‘l bilan ozod etish istisno qilinadi degani emas.
Britaniya nashrining qayd etishicha Ukrainaning yarimorolni qaytarib olish qobiliyatiga shubha bilan qaraydigan g‘arb amaldorlari Qrimni qaytarishga har qanday urinish Putinning urushni yadroviy qurol bilan avj oldirishiga sabab bo‘lishi mumkinligidan xavfsiramoqda.
Ukraina Rossiya bilan urushni tugatish bo‘yicha to‘g‘ridan to‘g‘ri maslahatlashuvlarni 2022-yil aprelida to‘xtatgan edi. Bungacha u Moskva bilan Qrimning kelajagi haqida muzokara olib borishga tayyor bo‘lgan va uni harbiy yo‘l bilan qaytarish niyatini ilgari surmagan. Sentabr oyida Rossiya Ukrainaning to‘rtta viloyatini anneksiya qilganidan so‘ng, Zelenskiy Putin bilan muzokara o‘tkazishni taqiqlaydigan farmonni imzoladi. Shundan kelib chiqib, Financial Times ta’kidlashicha, Ukraina prezidenti ofisi xodimining bayonoti 2022-yil aprelidan beri Kiyevning Rossiya bilan muzokaralarga qiziqishi haqidagi eng ochiq bayonotga aylandi.
Izoh (0)