Ukrainaliklar Belarus bilan chegarada katta ekran o‘rnatdi. Unda Zelenskiyning belaruslarga murojaati va o‘ldirilgan Bucha aholisining jasadlari ko‘rsatilmoqda

Ukrainaning Jitomir viloyatida, Belarus bilan chegarada Rossiya—Ukraina urushi tasvirlarini ko‘rsatuvchi katta ekran o‘rnatildi.

Ekrandagi rolikni “Belsat” nashri chop etdi va uni chegaradagi o‘quvchilari yuborganini ta’kidladi. Ekranda Aleksandr Lukashenkoning Ukrainaga bostirib kirgan Rossiyani qo‘llab-quvvatlovchi bayonotlari, Rossiyaning Ukraina hududini, jumladan, Belarusdan turib o‘qqa tutgani haqidagi lavhalar aks ettirilgan.

Videoda, shuningdek, Bucha shahrining Rossiya tomonidan bosib olinishi paytida halok bo‘lgan buchaliklar jasadlari surati va Ukraina prezidenti Vladimir Zelenskiyning belaruslarga murojaati aks etgan.

☝️ Бітва білбордаў на мяжы Украіны з Беларуссю працягваецца

На мяжы Жытомірскай вобласці з'явіўся вялізны праектар, з якога, як адзначаюць чытачы, што даслалі нам відэа, добра відаць і далёка чуваць праўду пра вайну ва Украіне, палітыку Лукашэнкі і падтрымку беларускага народу. pic.twitter.com/dV0JVAKFcF

— Belsat TV (@Belsat_TV) April 5, 2023

“Belsat” xabariga ko‘ra, Belarus xalqini qo‘llab-quvvatlash maqsadida Ukraina tomonidan chegarada Belarus bayrog‘i ham o‘rnatilgan. Nashr o‘quvchilarining aytishicha, ekrandagi translyatsiya Belarus hududida yaqqol ko‘rinib, eshitilib turadi.

Belarus Davlat chegara qo‘mitasi ekran o‘rnatilganiga hozircha izoh bermadi, deb yozadi “Zerkalo”. Avvalroq vazirlik Ukraina chegarachilarining “provokatsiyalari” haqida shikoyat qilgan edi. Aytilishicha, ular Belarusga dronlar yuborgan, Ukraina madhiyasini kuylagan va “Hozir granata otaman” deb qichqirgan.

Bundan tashqari, avval ham ikkala davlat chegaraga bilbordlar osib qo‘yishgan: unda ukrainaliklar belaruslarni “ruslar kabi bosqinchi bo‘lmaslikka” chaqirgan, bunga javoban belaruslar “haqiqiy bosqinchilar”ni topishga va’da bergan va “Belarusning yodida” yozuvi bilan Ikkinchi Jahon urushi fotosuratlarini namoyish qilgan.