O‘zbekistonning Jahon savdo tashkilotiga aʼzo bo‘lishi borasidagi ishlar davom etmoqda. Biroq, tashkilotga aʼzo bo‘lishning taxminiy davri nomaʼlum. Bu haqda AOKAda o‘tkazilgan matbuot anjumanida Investitsiyalar, sanoat va savdo vazirligi boshqarma boshlig‘i o‘rinbosari Amirbek Muhammedov maʼlum qildi.
“Daryo” muxbirining xabar berishicha, Amirbek Muhammedov muloqotda JSTga aʼzo bo‘lish uzoq vaqt talab qiladigan murakkab jarayonligini aytgan.
“Jarayon aslida cho‘zilmayapti. Chunki bu juda uzoq davom etadigan va qiyin masala. JSTga qo‘shilish hamma aʼzo mamlakatlarning konsensusiga binoan bo‘ladi. Bu degani, O‘zbekiston tashkilotga qo‘shilishi uchun 164 ta davlat rozilik berishi kerak. Shulardan kamida 47 ta davlat O‘zbekistoning JSTga qo‘shilishi bo‘yicha ishchi guruhiga aʼzo bo‘lib kirgan. Ishchi guruh beqaror, yaʼni istalgan vaqtda bir davlat guruhdan chiqib ketsa, boshqasi qo‘shilishi mumkin. Shu sababli ham ushbu jarayon uzoqqa cho‘ziladi”, — dedi u.
Amirbek Muhammedov qo‘shni mamlakatlarni misol keltirar ekan, Qozog‘iston JSTga 13 yil ichida, Rossiya esa 10 yil deganda aʼzo bo‘lganini aytdi.
“Shu bois, bu masalada aniq muhlat qo‘yib bo‘lmaydi. Chunki muzokoralar o‘zaro ikki tomonning kelishuvlari asosida amalga oshiriladi. Buning chet el bilan ham bog‘liq joylari bor”, — dedi vazirlik masʼuli.
Muloqotda rasmiylar O‘zbekistonning JSTga aʼzo bo‘lish harakatlari 1994-yildan boshlangani, biroq jarayon 2005-yilda to‘xtatilganini taʼkidladi. Hozirda esa jarayon qayta tiklangan.
“2020-yilda birinchi ishchi guruh bilan yangi jarayonda yig‘ilish o‘tkazdik. Ishlarni tezlashtirgan holda har yili bittadan ishchi guruh yig‘ilishi tashkil etyapmiz. Hozirgi kunda bizning iqtisodiy tizim bo‘yicha muhokama ketyapti. Biz majburiyat olish, ayrim jihatlarga o‘zgartirish kiritish kabi jarayonlarga endi o‘tib kelmoqdamiz”, — deya qo‘shimcha qildi Amirbek Muhammedov.
Avvalroq Senat raisining birinchi o‘rinbosari Sodiq Safoyev “Daryo” nashriga bergan intervyusida JSTga kirish O‘zbekiston uchun yangi imkoniyatlar ochishini aytgandi.
“Albatta, imkoniyat ochishi bilan birga, alohida bir sektor yoki tarmoqlarimizga qandaydir muammolarni ham tug‘dirishi mumkin. Lekin umuman olganda, shu tashkilotga kirmagan sanoqli davlatlar qoldi. Va bizning u yerda bo‘lmasligimiz, o‘zimizning iqtisodiy, milliy manfaatlarimizni himoya qilish uchun vositalardan foydalanmayotganimizni bildiradi. JSTga kirish bizning oldimizda turgan muhim masalalardan biri”, — degan Safoyev.
Izoh (0)