Ўзбекистоннинг Жаҳон савдо ташкилотига аъзо бўлиши борасидаги ишлар давом этмоқда. Бироқ, ташкилотга аъзо бўлишнинг тахминий даври номаълум. Бу ҳақда АОКАда ўтказилган матбуот анжуманида Инвестициялар, саноат ва савдо вазирлиги бошқарма бошлиғи ўринбосари Амирбек Муҳаммедов маълум қилди.
“Дарё” мухбирининг хабар беришича, Амирбек Муҳаммедов мулоқотда ЖСТга аъзо бўлиш узоқ вақт талаб қиладиган мураккаб жараёнлигини айтган.
“Жараён аслида чўзилмаяпти. Чунки бу жуда узоқ давом этадиган ва қийин масала. ЖСТга қўшилиш ҳамма аъзо мамлакатларнинг консенсусига биноан бўлади. Бу дегани, Ўзбекистон ташкилотга қўшилиши учун 164 та давлат розилик бериши керак. Шулардан камида 47 та давлат Ўзбекистонинг ЖСТга қўшилиши бўйича ишчи гуруҳига аъзо бўлиб кирган. Ишчи гуруҳ беқарор, яъни исталган вақтда бир давлат гуруҳдан чиқиб кетса, бошқаси қўшилиши мумкин. Шу сабабли ҳам ушбу жараён узоққа чўзилади”, — деди у.
Амирбек Муҳаммедов қўшни мамлакатларни мисол келтирар экан, Қозоғистон ЖСТга 13 йил ичида, Россия эса 10 йил деганда аъзо бўлганини айтди.
“Шу боис, бу масалада аниқ муҳлат қўйиб бўлмайди. Чунки музокоралар ўзаро икки томоннинг келишувлари асосида амалга оширилади. Бунинг чет эл билан ҳам боғлиқ жойлари бор”, — деди вазирлик масъули.
Мулоқотда расмийлар Ўзбекистоннинг ЖСТга аъзо бўлиш ҳаракатлари 1994 йилдан бошлангани, бироқ жараён 2005 йилда тўхтатилганини таъкидлади. Ҳозирда эса жараён қайта тикланган.
“2020 йилда биринчи ишчи гуруҳ билан янги жараёнда йиғилиш ўтказдик. Ишларни тезлаштирган ҳолда ҳар йили биттадан ишчи гуруҳ йиғилиши ташкил этяпмиз. Ҳозирги кунда бизнинг иқтисодий тизим бўйича муҳокама кетяпти. Биз мажбурият олиш, айрим жиҳатларга ўзгартириш киритиш каби жараёнларга энди ўтиб келмоқдамиз”, — дея қўшимча қилди Амирбек Муҳаммедов.
Аввалроқ Сенат раисининг биринчи ўринбосари Содиқ Сафоев “Дарё” нашрига берган интервьюсида ЖСТга кириш Ўзбекистон учун янги имкониятлар очишини айтганди.
“Албатта, имконият очиши билан бирга, алоҳида бир сектор ёки тармоқларимизга қандайдир муаммоларни ҳам туғдириши мумкин. Лекин умуман олганда, шу ташкилотга кирмаган саноқли давлатлар қолди. Ва бизнинг у ерда бўлмаслигимиз, ўзимизнинг иқтисодий, миллий манфаатларимизни ҳимоя қилиш учун воситалардан фойдаланмаётганимизни билдиради. ЖСТга кириш бизнинг олдимизда турган муҳим масалалардан бири”, — деган Сафоев.
Изоҳ (0)