O‘zbekistonning ayrim hududlarida dam olish kuni do‘l yog‘ishi kutilmoqda

“O‘zgidromet” dam olish kunlari uchun ob-havo ma’lumotini e’lon qildi.

Unga ko‘ra, 1-aprel, shanba kuni O‘zbekiston hududining katta qismida yog‘ingarchilik kutilmaydi, faqat Samarqand, Jizzax, Qashqadaryo, Surxondaryo viloyatlarida bugun kunduz kuni ba’zi joylarda qisqa muddatli momaqaldiroqli yomg‘ir yog‘adi. Kunduzgi havo harorati 20-25 atrofida bo‘ladi.

Yakshanba kuni Kaspiy dengizining janubiy hududlaridan siklon kirib kelishi, buning hisobiga nam havo massalari kirib kelishi kutilmoqda. O‘zbekiston hududi bo‘yicha ba’zi joylarda qisqa muddatli momaqaldiroqli yomg‘ir yog‘adi. Navoiy, Samarqand, Qashqadaryo viloyatlarida, tog‘oldi va tog‘li hududlarda ba’zi joylarda kuchli bo‘ladi. Respublikaning ayrim hududlarida do‘l yog‘ishi mumkin. Faqat sharqiy hududlarda yog‘ingarchiliksiz ob-havo saqlanib turadi.

1—2-aprelda respublika bo‘yicha ba’zi joylarda shamol tezligi 15-20 metr/sekundgacha kuchayishi, respublika shimolida va cho‘l hududlarida 22-25 metr/sekundgacha kuchayishi, ayrim joylarda chang-to‘zon bilan kuzatilishi mumkin.

2-aprelda tog‘oldi va tog‘li hududlarda sel-suv toshqin hodisalari yuzaga kelishi mumkin.

Toshkentda asosan yog‘ingarchiliksiz ob-havo bo‘lishi kutilmoqda. Shamol 3-8 metr/sekund tezlikda esadi. Havo harorati 24-27 daraja bo‘ladi.