Xorazm viloyatiga ijtimoiy muammolarni hal qilish uchun 2023-yilda qo‘shimcha 400 mlrd so‘m ajratiladi

Ayni vaqtda prezident Shavkat Mirziyoyev xalq deputatlari Xorazm viloyati Kengashi sessiyasida ishtirok etmoqda. Bu haqda “Daryo” muxbiri xabar berdi. 

Xorazm viloyati hokimi vazifasini bajaruvchi Jo‘rabek Rahimov maktab va bog‘chalar barpo etish, aholini uy-joy, ichimlik suvi bilan taʼminlash, yo‘llarni taʼmirlash, umuman mahallada yashash sharoitlarini yaxshilash bo‘yicha rejalarini maʼlum qildi. 

Prezident hokimning maktablarda sanitariya holatini yaxshilash, “2 ta til va 1 ta kasbga o‘rgatish” xonalarini tashkil qilish hamda 12 ta tumanda “IT park” ochish tashabbusi maʼqul bo‘lganini aytdi va bunga qo‘shimcha 60 milliard so‘m ajratish bo‘yiicha topshiriq berdi.

Shuningdek, 1-avgustga qadar 25 ta og‘ir maktabni parta bilan taʼminlashga 30 milliard so‘m ajratiladi. 100 ta maktabdagi kompyuter sinflari uchun 20 milliard so‘m yo‘naltiriladi. Bundan tashqari, 9 ta tibbiyot muassasasi zamonaviy uskunalar bilan jihozlash masalasi hal qilinadi. Viloyat hamda Yangibozor va Bog‘ot perinatal markazlariga uchta reanimobil yetkazib beriladi.

Viloyatda yil yakunigacha avariya holatidagi 14 ta ko‘prik taʼmirlanadi. Umuman viloyatdagi mahalliy yo‘llarni to‘liq taʼmirlashga 90 million dollar yo‘naltiriladi. 2023-yilda Pitnak, Urganch va Xiva shaharlarida ichimlik va oqova suvini yaxshilash loyihasini boshlashga 41 million dollar yo‘naltiriladi. 

Yil yakunigacha Tuproqqalʼa, Hazorasp, Bog‘ot, Xonqa va Yangiariqni uzluksiz ichimlik suvi bilan taʼminlash uchun “Kaparass” nasos stansiyasidagi ishlar yakunlanadi va bunga 60 milliard so‘m ajratiladi. Sharoiti og‘ir 6 792 ta oila uy-joyini yaxshilash hamda ichki yo‘llar, elektr va ichimlik suvi tarmog‘ini taʼmirlashga 280 milliard so‘m yo‘naltiriladi.

Shuningdek:

• yangi qurilayotgan “Al-Xorazmiy” uy-joy massivining infratuzilmasiga 100 milliard so‘m;
• Yangiariq va Yangibozordagi ichimlik suvi og‘ir 5 ta mahallaga, shuningdek 14 ta maktabga olib boradigan piyoda yo‘llarini taʼmirlashga 20 milliard so‘m;
• Gurlan, Yangibozor, Urganch, Xonqa, Bog‘ot va Hazorasp tumanlaridagi 49 ta qishloqda maktab, bog‘cha, yo‘l va ichimlik suvi muammolarini hal qilishga 85 million dollar yo‘naltiriladi. 

“Umuman olganda, Xorazmda ijtimoiy muammolarni hal qilishga 2023-yilda qo‘shimcha 400 milliard so‘m, oilaviy tadbirkorlikni rivojlantirishga yana 150 milliard so‘m ajratilayapti. Bundan tashqari, agrar soha, ichimlik suvi va tadbirkorlik loyihalariga qo‘shimcha 475 million dollar jalb qilish bo‘yicha topshiriq berdim. Viloyat hokimi bunga qo‘shimcha 200 milliard so‘m topib, viloyatda barcha masalalarni to‘liq hal qilish majburiyatini oladi”, — deya qo‘shimcha qildi Shavkat Mirziyoyev.