Ayni vaqtda Shavkat Mirziyoyev ishtirokida Urganch shahrida Xalq deputatlari Xorazm viloyati kengashi sessiyasi bo‘lib o‘tmoqda. Bu haqda “Daryo” muxbiri xabar berdi.
Sessiyada tashkiliy masala ko‘rib chiqilgan. Prezident Xorazm viloyati hokimi lavozimiga hokim vazifasini bajarib kelayotgan Jo‘rabek Rahimov nomzodini tavsiya etdi.
Nomzod viloyatda aholi bandligini taʼminlash va daromadini oshirish, oziq-ovqat xavfsizligini taʼminlash, sanoatni rivojlantirish, energetika quvvatlarini oshirish, ijtimoiy masalalarni hal etish, mahallada yashash sharoitlarini yaxshilash bo‘yicha rejalarini taqdimot qildi.
So‘ng Xorazm viloyati hokimini tayinlash masalasi ovozga qo‘yilgan. Ovozga qo‘yish natijalariga ko‘ra, Jo‘rabek Rahimov viloyat hokimi etib tasdiqlandi.
Ayni paytda sessiyada viloyatni yanada rivojlantirish istiqbollari muhokama qilinmoqda, kelgusi reja va vazifalar belgilab olinmoqda.
Eslatib o‘tamiz, 2022-yil dekabrda Farhod Ermanov Xorazm viloyati hokimi lavozimidan ozod etilib, Qoraqalpog‘iston Respublikasi Jo‘qorg‘i Kengesi tomonidan Qoraqalpog‘iston Vazirlar Kengashi raisi lavozimiga tasdiqlangan edi. Shundan so‘ng Jo‘rabek Rahimov Xorazm viloyati hokimi vazifasini bajaruvchi etib tayinlangandi.
Izoh (0)