Bugun,

  • USD 11095.31
  • RUB 173.84
  • EUR 10772.44

Xitoy—Qirg‘iziston—O‘zbekiston temiryo‘lini qurish loyihasining hujjat ishlari yakunlanmoqda. Bu haqda 31-mart kuni AOKAda bo‘lib o‘tgan matobuot anjumanida Investitsiyalar, sanoat va savdo vaziri o‘rinbosari Oybek Hamrayev maʼlum qildi.

Oybek Xamrayev
Foto: AOKA

Oybek Hamrayevning aytishicha, hozirda loyiha ofisi Qirg‘izistonda ish boshlagan.

“Bu biz uchun logistika sohasidagi muhim, strategik loyiha hisoblanadi. Bunga yana qo‘shimcha ravishda Termiz—Mozori sharif—Peshovar temiryo‘lini qurish loyihasi ham bor. Bu ikkita temiryo‘l qurilishi bo‘yicha ishlar parallel olib borilmoqda. Hozir loyiha ofisi Qirg‘izistonda o‘z ishini boshladi. Loyihaning hujjat ishlari yakunlanmoqda. Qirg‘iziston, O‘zbekiston va Xitoy hukumatlari loyihani moliyalashtirishda xalqaro moliya institutlarini jalb qilish bo‘yicha birgalikda ishlamoqda”, — dedi vazirlik rasmiysi.

Xitoy, Qirg‘iziston va O‘zbekistonni bog‘laydigan temiryo‘l qurilishi 25 yil davomida rejalashtirilgan. 1997-yildayoq loyiha bo‘yicha o‘zaro anglashuv memorandumi imzolangan.

Avvalroq Qirg‘iziston prezidenti Sadir Japarov Xitoy—Qirg‘iziston—O‘zbekiston (CKU) temiryo‘li qurilishi jarayoni 2023-yildan boshlanishini maʼlum qilgandi.

“Joriy yilda (2022-yil) texnik-iqtisodiy asoslarni tayyorlab, qurilishni 2023-yilda ish boshlaymiz. Uchala davlat ham jarayonga tayyorlanmoqda. Loyiha natijasida ish o‘rinlari yaratiladi, iqtisodiyotimiz o‘sadi”, — degandi Japarov.

Prezident Shavkat Mirziyoyev 2022-yilda o‘tkazilgan Toshkent xalqaro investitsiya forumining ochilish marosimidagi nutqida ham ushbu temiryo‘l qurilishiga to‘xtalib o‘tgan.

“O‘zbekistonda ishlab chiqarilayotgan mahsulotlarni O‘zbekiston—Qirg‘iziston—Xitoy temiryo‘li orqali Osiyo—Tinch okeani mintaqasiga yetkazish uchun imkoniyatlar yaratish bo‘yicha amaliy harakatlar olib borilmoqda”, — degan davlat rahbari.

O‘zbekiston rasmiylari avvalroq temiryo‘l qurib bitkazilgandan so‘ng, bu Xitoydan Yevropa va Yaqin Sharqqa yuk tashish uchun eng qisqa yo‘l bo‘lib, yuk tashish yo‘lini 900 kilometrga qisqartirishini va 7-8 kunlik yuk tashish vaqtini tejashini aytgandi.

Xitoy—Yevropa yuk temiryo‘lining janubiy qismiga aylanadigan CKU yo‘nalishi Xitoy, Qirg‘iziston va O‘zbekistonni Eron va Turkiya orqali Markaziy va Sharqiy Yevropaga bog‘laydi. Rejaga ko‘ra, temiryo‘lning umumiy uzunligi qariyb 523 kilometrni tashkil etadi. Jumladan, Xitoyda 213 kilometr, Qirg‘izistonda 260 kilometr va O‘zbekistonda 50 kilometrga yaqin qismi quriladi.

 

Izoh
Asosiy yangiliklar
Sport
Holand — eng yaxshi o‘yinchi, Spalletti — eng yaxshi murabbiy. Goal Yevropada mavsumning eng yaxshilarini aniqladi
Shou-biznes
Boshqa rol uchun kasting topshirib, butunlay boshqa obrazni yaratgan Marvel yulduzlari (foto)
Mahalliy
O‘zbekistonda ichimlik suvidan foydalanish bo‘yicha ko‘p qavatli uylar o‘rtasida reyting tizimi ishga tushiriladi