Samarqandda fuqarolarni AQSHga jo‘natishini aytib, pul olgan yana bir kishiga jinoyat ishi qo‘zg‘atildi

IIV huzuridagi Tergov departamenti Samaqandda fuqarolarni AQSHga jo‘natishini aytib, pul olgan yana bir kishiga jinoyat ishi qo‘zg‘atilganini ma’lum qildi.

Qayd etilishicha, 2023-yil 28-mart kuni Samarqand shahrida yashovchi 37 yoshli R.I. ariza bilan murojaat qilib, 2019-yilning sentabrida tanishi — 39 yoshli X.A. fuqarolarni AQSHga yuborish bilan shug‘ullanishini, ukasini ham AQSHga yuborishini aytib ishontirib, 4,5 ming dollar pullarini qo‘lga kiritganini, lekin bergan vaʼdasini bajarish uchun ishlatmay, o‘zi ehtiyoji uchun ishlatib yuborganni bayon etgan.

Olib borilgan tergovga qadar tekshiruv harakatlari natijasida X.A. avval ham bu turdagi jinoyatlarni sodir etgani uchun sudlangani va u ayni vaqtda jazo muddatini o‘tab kelayotgani aniqlangan.

Mazkur holat yuzasidan Samarqand shahri bo‘yicha IIO FMB huzuridagi Tergov bo‘limi tomonidan Jinoyat kodeksning 168-moddasi 3-qismi “b” bandi (bir guruh shaxslar bilan oldindan til biriktirib sodir etilgan firibgarlik) bilan jinoyat ishi qo‘zg‘atilgan.

Hozirda tergov harakatlari olib borilmoqda.