O‘zbekistonda savdo qoidalarini buzganlik uchun jinoiy javobgarlik bekor qilinmoqda

O‘zbekistonda savdo qoidalarini buzganlik uchun jinoiy javobgarlikni bekor qilish rejalashtirilmoqda. Qonun loyihasi jamoatchilik muhokamasiga qo‘yilgan.

Joriy jinoyat kodeksining 189-moddasida savdo yoki xizmat ko‘rsatish qoidalarini buzganlik uchun jinoiy javobgarlik belgilangan.

Bugungi kunda tovarlar savdosi yoki xizmat ko‘rsatish qoidalarini juda ko‘p miqdordagi qiymatda buzganlik uchun tadbirkorlar jinoiy javobgarlikka tortilmoqda. 

Ta’kidlanishicha, sudlanganlikning huquqiy oqibatlari tadbirkorlarning keyingi faoliyatiga ta’sir ko‘rsatib kelmoqda. 

Yangi qonun loyihasiga ko‘ra, savdo qoidalarini buzganlik uchun jinoiy javobgarlik bekor qilinib, uning o‘rniga ma’muriy javobgarlik paydo bo‘ladi.

Jazo sifatida fuqarolarga — BHMning 200 baravarigacha (60 million so‘m), mansabdor shaxslarga — BHMning 300 baravarigacha (90 million so‘m) jarima nazarda tutilgan. 

Shuningdek, savdo yoki xizmatlar ko‘rsatish qoidalarini o‘ta katta miqdorda (500 BHM va undan yuqori) buzganlik uchun ma’muriy javobgarlik belgilanadi.

Loyihani ishlab chiqishda Qozog‘iston, Ozarbayjon, Belorussiya, Moldaviya kabi davlatlar qonunchiligi tahlil qilingan.

Ma’lum bo‘lishicha, ushbu loyihani qabul qilish O‘zbekiston Davlat budjetidan qo‘shimcha xarajatlar talab etmaydi.