Ўзбекистонда савдо қоидаларини бузганлик учун жиноий жавобгарлик бекор қилинмоқда

Ўзбекистонда савдо қоидаларини бузганлик учун жиноий жавобгарликни бекор қилиш режалаштирилмоқда. Қонун лойиҳаси жамоатчилик муҳокамасига қўйилган.

Жорий жиноят кодексининг 189-моддасида савдо ёки хизмат кўрсатиш қоидаларини бузганлик учун жиноий жавобгарлик белгиланган.

Бугунги кунда товарлар савдоси ёки хизмат кўрсатиш қоидаларини жуда кўп миқдордаги қийматда бузганлик учун тадбиркорлар жиноий жавобгарликка тортилмоқда. 

Таъкидланишича, судланганликнинг ҳуқуқий оқибатлари тадбиркорларнинг кейинги фаолиятига таъсир кўрсатиб келмоқда. 

Янги қонун лойиҳасига кўра, савдо қоидаларини бузганлик учун жиноий жавобгарлик бекор қилиниб, унинг ўрнига маъмурий жавобгарлик пайдо бўлади.

Жазо сифатида фуқароларга — БҲМнинг 200 бараваригача (60 миллион сўм), мансабдор шахсларга — БҲМнинг 300 бараваригача (90 миллион сўм) жарима назарда тутилган. 

Шунингдек, савдо ёки хизматлар кўрсатиш қоидаларини ўта катта миқдорда (500 БҲМ ва ундан юқори) бузганлик учун маъмурий жавобгарлик белгиланади.

Лойиҳани ишлаб чиқишда Қозоғистон, Озарбайжон, Белоруссия, Молдавия каби давлатлар қонунчилиги таҳлил қилинган.

Маълум бўлишича, ушбу лойиҳани қабул қилиш Ўзбекистон Давлат бюджетидан қўшимча харажатлар талаб этмайди.