Dunyodagi eng katta xususiy neft treyderi 2022-yilni rekord darajada — 15 mlrd dollar foyda bilan yakunladi
Dunyodagi eng yirik mustaqil neft treyderi — Vitol 2022-yilda 15 mlrd dollar sof foyda oldi. Bu haqda Financial Times (FT) o‘z manbalariga tayanib xabar bermoqda.
15 mlrd dollarlik sof foyda kompaniya uchun rekord ko‘rsatkich bo‘lib, uning avvalgi olti yildagi umumiy foydasiga teng.
Avvalroq kompaniya aylanmasi qariyb ikki baravar oshgani haqida xabar bergan edi — 2021-yildagi 279 mlrd dollardan 2022-yilda 505 mlrd dollargacha.
Rossiya va Ukraina o‘rtasida urush boshlanganidan so‘ng narxlarning keskin oshishi tufayli neft kompaniyalari o‘tgan yili katta foyda ko‘rdi.
Trafigura, Glencore va Mercuria kompaniyalari ham avvalroq rekord raqamlar haqida xabar bergan edi. Shu bilan birga, Vitol foyda bo‘yicha raqobatchilardan ancha o‘zib ketdi.
Vitol kompaniyaning foydasi haqidagi FT ma’lumotlariga izoh berishdan bosh tortdi. Xususiy kompaniya bo‘lgani sababli u o‘z faoliyatining moliyaviy natijalarini rasman e’lon qilishi shart emas.
