Inson huquqlari bo‘yicha komissar Dmitriy Lubinets Ukrainaga qarshi boshlangan urushda Rossiya albatta urushda yutqazishini aytdi. Bu haqda u RBC-Ukraina’ga bergan intervyusida ma’lum qildi.
“Rossiya urushda albatta yutqazadi. Ukraina esa g‘alaba qozonadi. Lekin tafovutlar bo‘lishi mumkin".
Lubinets tafovut deganida g‘alaba va mag‘lubiyatni har ikki tomon o‘zi uchun turlicha talqin qilishi bilan izohladi. U xalqaro hamjamiyat Ukraina “mazkur xalqaro konfliktda” mag‘lub bo‘lolmasligini tushunishini aytdi. Lubinets nima uchun Ukraindagi vaziyatni urush deb atamaganiga ham to‘xtalib o‘tdi:
“Xalqaro gumanitar qonunlarga ko‘ra, mamlakatimizda sodir bo‘layotgan voqealar ‘Rossiya-Ukraina xalqaro harbiy konflikti’dir. Ayni paytda qarama-qarshilik qancha davom etishini hech kim bilmaydi. Buning uchun yana qancha kurashishimiz, qanday bosqichlarni bosib o‘tishimiz kerak — hech kim bilmaydi.
Lekin biz g‘alaba qozonishimizni bilaman. Vaqtincha bosib olingan barcha Ukraina hududlarini, Lugansk, Donetsk, Xerson, Zaporojye viloyatlari va Qrim avtonom respublikasini ozod qilishimiz kerak va shunday qilamiz”, — dedi Lubinets.
Ukrainaning qarshi hujumi
Avvalroq Ukraina Mudofaa vazirligi armiyaga yirik qarshi hujumni boshlashga tayyorgarlik ko‘rishi uchun yana bir necha oy kerak bo‘lishini aytgandi. Hammasi G‘arb qurollari yetkazib berilishiga va Ukraina bo‘linmalarining ulardan foydalana olishiga bog‘liqligi ta’kidlangan.
Ukraina prezidenti Vladimir Zelenskiy Ukraina o‘q-dori va qurol-yarog‘ yetishmasligi sababli hozircha qarshi hujumga o‘ta olmasligini aytgan. U mamlakat sharqidagi vaziyatni og‘ir deb baholagan.
“Biz hamkorlarimizdan o‘q-dorilar kelishini kutmoqdamiz. (Qarshi hujumni) hali boshlay olmaymiz”, — degan edi u.
Izoh (0)