Rossiya prezidenti Vladimir Putinning matbuot kotibi Dmitriy Peskov madaniy va siyosiy elitani urush uzoq davom etishi haqida ogohlantirdi. The Guardian Putin qanday qilib Ukrainadagi cho‘zilgan urush fonida Rossiyani G‘arb bilan “cheksiz urush”ga tayyorlayotgani haqida maqola e’lon qildi.
Nashr suhbatdoshlariga ko‘ra, 2022-yil dekabr oyi oxirida Rossiya madaniy va siyosiy elitalari ziyofat uyushtirgan. Kechada Kreml matbuot kotibi Peskov ham qatnashib, qadah ko‘tarib urush davom etishini aytgan.
“O‘ylaymanki, siz men nimadir deyishimni kutayotgandirsiz. Barchasi juda qiyin bo‘ladi va juda uzoq davom etadi”, — degan u.
Ziyofatning ikki nafar ishtirokchisi Peskovning gaplari mehmonlarning kayfiyatini buzgani, sababi ularning aksariyati Ukrainadagi urushga qarshi bo‘lganini aytdi.
“Kreml matbuot kotibining nutqini eshitish noqulay edi. U urush biz bilan qolishi va uzoq safarga tayyorgarlik ko‘rishimiz kerakligini ogohlantirayotgani aniq edi”, — dedi ziyofatdan ishtirok etgan mehmonlardan biri.
Rossiya rejasiga ko‘ra, bir necha hafta davom etishi kerak bo‘lgan bosqindan bir yildan ko‘proq vaqt o‘tgach, Putin hukumati jamiyatni G‘arb bilan urush holatiga keltirmoqda va uzoq yillik mojaroga kirishmoqda.
Yaqinda Buryatiyadagi aviatsiya zavodi ishchilari oldida so‘zlagan nutqida Putin urushni yana bir bor Rossiyaning omon qolishi uchun kurash deb atagan.
“Biz uchun bu geosiyosiy vazifa emas, balki Rossiya davlatchiligini saqlab qolish, mamlakat va farzandlarimiz kelajakdagi taraqqiyoti uchun shart-sharoit yaratish vazifasidir”, — degan u.
“Putin urushning har qanday aniq maqsadlari haqida gapirishni deyarli to‘xtatdi. U kelajakdagi g‘alaba qanday bo‘lishi mumkinligi haqida hech qanday tasavvurga egamas. Urushning aniq boshlanishi ham, bashorat qilinadigan oxiri ham yo‘q”, — dedi siyosatshunos Maksim Trudolyubov.
Izoh (0)