Инсон ҳуқуқлари бўйича комиссар Дмитрий Лубинец Украинага қарши бошланган урушда Россия албатта урушда ютқазишини айтди. Бу ҳақда у RBC-Ukraina’га берган интервьюсида маълум қилди.
“Россия урушда албатта ютқазади. Украина эса ғалаба қозонади. Лекин тафовутлар бўлиши мумкин".
Лубинец тафовут деганида ғалаба ва мағлубиятни ҳар икки томон ўзи учун турлича талқин қилиши билан изоҳлади. У халқаро ҳамжамият Украина “мазкур халқаро конфликтда” мағлуб бўлолмаслигини тушунишини айтди. Лубинец нима учун Украиндаги вазиятни уруш деб атамаганига ҳам тўхталиб ўтди:
“Халқаро гуманитар қонунларга кўра, мамлакатимизда содир бўлаётган воқеалар ’Россия-Украина халқаро ҳарбий конфликти’дир. Айни пайтда қарама-қаршилик қанча давом этишини ҳеч ким билмайди. Бунинг учун яна қанча курашишимиз, қандай босқичларни босиб ўтишимиз керак — ҳеч ким билмайди.
Лекин биз ғалаба қозонишимизни биламан. Вақтинча босиб олинган барча Украина ҳудудларини, Луганск, Донецк, Херсон, Запорожье вилоятлари ва Қрим автоном республикасини озод қилишимиз керак ва шундай қиламиз”, — деди Лубинец.
Украинанинг қарши ҳужуми
Аввалроқ Украина Мудофаа вазирлиги армияга йирик қарши ҳужумни бошлашга тайёргарлик кўриши учун яна бир неча ой керак бўлишини айтганди. Ҳаммаси Ғарб қуроллари етказиб берилишига ва Украина бўлинмаларининг улардан фойдалана олишига боғлиқлиги таъкидланган.
Украина президенти Владимир Зеленский Украина ўқ-дори ва қурол-яроғ етишмаслиги сабабли ҳозирча қарши ҳужумга ўта олмаслигини айтган. У мамлакат шарқидаги вазиятни оғир деб баҳолаган.
“Биз ҳамкорларимиздан ўқ-дорилар келишини кутмоқдамиз. (Қарши ҳужумни) ҳали бошлай олмаймиз”, — деган эди у.
Изоҳ (0)