O‘zbekiston xalq artisti Rajab Adashev “Daryo” internet-nashriga eksklyuziv intervyu berdi. Intervyuni jurnalist Feruz Muhammad tashkillashtirdi.
Suhbat davomida Rajab Adashev uzoq yillar uysizlik muammosi bilan qiynalgani, uy so‘rab Sharof Rashidovga xat yozgani, 13 yil ijarada yashab, 10 ta uy almashtirgani haqida gapirib berdi.
“O‘sha paytlari qanday qilib uyli bo‘laman, deb o‘ylardim”
“Biz 1964-yildan 1977-yilgacha o‘n marta ijara xonadonini almashtirdik. 1972-yilda uylandim, 1974-yilda esa ikkita farzandim tug‘ildi. O‘shanda ham ijarama-ijara yashaganman, ayolim esa yozda ham, qishda ham Urgutdagi qishloqda yashashiga to‘g‘ri kelardi. O‘sha paytlari qanday qilib uyli bo‘laman, deb o‘ylardim.
Keyin uy masalasida Urgutda ishlaydigan uzoq qarindoshimiz Latif aka Hamidovdan maslahat so‘radim. U kishi Baratboy Qobilovni topasiz va ana shu kishidan maslahat so‘raysiz, dedi. Xuddi shunday qildim, u kishi bilan uchrashsam, ular aytdiki, “Otaga uy-joyim yo‘q. lekin umrimning oxirigacha kino bilan yashayman”, deb maktub yozing dedi.
Endi tasodifni qarang, 1965-yilda Kasaba uyushmasiga “Mening kvartiram yo‘q, kvartira bilan ta’minlashingizni iltimos qilaman”, deb yozgan arizam qolib ketgandi.
Sharof Rashidovga xat yozganimdan keyin “Kinoaktyorlar” studiyasida shanbalik uyushtirib, tashlab yuborish uchun ortiqcha qog‘ozlarni hammasini bir yerga to‘plab qo‘yishgan ekan. Ana shu yerdan 1965-yilda yozgan arizamni topib oldim. Oradan ikki-uch kun o‘tib, meni kvartiraga navbatda turganlar ro‘yxatining tepasiga chiqarib qo‘yishdi.
Birinchi bo‘lib Kasaba uyushmasining raisi Obid aka menga Qoraqamishdan berilayotgan uylar manzilini berib, “Qoraqamishdan uy olasizmi”, dedi. Ammo borib ko‘rganimda uy menga yoqmadi — uy to‘rt xonalik edi-yu, biroq hammayog‘i ochiq ekan. Keyin “u uyni rad etib, yana bir-ikki oy kutaman”, deganimdan keyin kinoteatrning yonidan mana shu, hozir yashayotgan uyim chiqib qoldi. Shu bilan 1978-1979-yillarda uyni oldim: 40 yildan buyon shu uyda yashayapmiz”.
Ma’lumot uchun, Rajab Adashev 1944-yil 15-iyul kuni Samarqand viloyati Urgut tumanida tug‘ilgan. Ostrovskiy nomidagi Toshkent teatr va san’at institutining aktyorlik fakultetini tamomlagan. Kinodagi faoliyati 1964-yildan boshlangan. 100 dan ortiq filmlarda rol ijro etgan.
Rajab Adashev 1993-yilda “Abdullajon” filmidagi “Eng yaxshi erkak roli uchun” mukofot, 1997-yilda O‘zbekistonda xizmat ko‘rsatgan artist, 2010-yilda O‘zbekiston xalq artisti, 2021-yilda “Do‘stlik” ordeni, 2022-yilda “San’at va madaniyat fidokori”, “Mehnat faxriysi”, “Kinematografiya fidokori” kabi unvon va mukofotlariga munosib ko‘rilgan.
Batafsil reportajni quyida tomosha qilishingiz mumkin.
https://www.youtube.com/watch?v=lSRYJ_PmqwY&t=3s
Izoh (0)