Faqat Farhod Mannopov emas: 30 yoshga ham to‘lmay vafot etgan o‘zbek shou-biznesi yulduzlari
San’at vakillari orasida hayot zavqini totmay turib, bu olamdan o‘tganlari talaygina. Ularning ayrimlari 30 yoshni ham qarshilashga ulgurmagan. Ular qisqa umr ko‘rgan bo‘lsa-da, samarali ijod qildi va odamlar mehrini qozondi.
23 yoshida pichoqlangan Laylo
“O‘zbekiston”, “Jonginam”, “Yondiradi” kabi qo‘shiqlari bilan millionlab tinglovchilar qalbiga kirib borgan xonanda Laylo Aliyeva 23 yoshida qotillik qurboni bo‘lgan.
1975-yilda Samarqand shahrida ziyolilar oilasida tug‘ilgan ijodkor Toshkentda ulg‘aygan. Uning katta bobosi mashhur zargarlardan biri edi. Laylo Aliyeva ikki yoshga kirganida “Moda” jurnalida rasmlari chiqadi, o‘n yoshida esa “Semurg‘” oromgohidagi “Go‘zallik” tanlovida yuqori o‘ringa loyiq ko‘riladi. U hozirgi Milliy raqs va xoreografiya oliy maktabini bitirgach, O‘zbekiston Davlat konservatoriyasida o‘qiydi. O‘zbekiston xalq artisti Saodat Qobulovaning sevimli shogirdlaridan biri hisoblangan xonanda O‘zbekiston xalq artisti Farrux Zokirovdan ham qo‘shiq aytish sirlarini o‘rganadi. Qisqa vaqt ichida shirali ovozi va go‘zalligi bilan omma nazariga tushib, muxlislar orttiradi. Xonanda oz umri davomida yigirmadan ziyod qo‘shiqlar ijro qilib, ikkita albom chiqaradi.
Laylo Aliyevaning fojiali o‘limi yashin tezligidek tarqalib, barchani hayratga soladi. Ma’lumotlarga ko‘ra, 1998-yilning 1-may kuni o‘sha vaqtda mashhur bo‘lgan “Al-Vakil” guruhining ikki nafar yigiti xonandani yashash uyida qirq ikki joyidan pichoqlab, vahshiylarcha o‘ldiradi. Uning Jasurbek ismli farzandi bor edi.
Avtohalokat qurboni bo‘lgan Mo‘min Oripov
“Jiyda gullaganda”, “Boyvachcha”, “Anhor bo‘yida”, “Eslama meni” kabi qo‘shiqlari bilan o‘zbek yoshlari orasida shuhrat qozongan “Bojalar” guruhi a’zosi Mo‘min Oripov ham hayotdan erta ko‘z yumgan.
“Boyvachcha”, “Nortoy”, “Achchiq hayot” singari filmlarda turli darajadagi rollarni talqin qilgan serqirra ijodkor 25 yoshida baxtsiz hodisa tufayli vafot etgan. Mazkur noxush voqea 2009-yilning 28-iyunidan 29-iyuniga o‘tar kechasi Surxondaryo viloyatining Angor tumanida yuz bergan. Avtohalokat oqibatida guruh a’zosi Jahongir Poziljonov va Javlon Shodmonov og‘ir tan jarohatlari olgan hamda oylab shifoxonada yotib, oyoqqa turgan.
28 yoshida olamdan o‘tgan boshlovchi
Suxandon va xonanda sifatida tanilgan Dildora Qayumova 28 yoshida vafot etgan. U 1980-yil 19-dekabrda Namangan viloyatida tug‘ilgan. Ustazoda ijodkor taniqli televideniye rejissori Zokir Qayumov va O‘zbekiston xalq artisti Malika Qayumovaning farzandi bo‘lib, karyerasini 1998-yilda O‘zbekiston televideniyesida boshlagan.
“Unutmoq osonmas”, “Musiqiy tanaffus”, “Yangi yilda yangi qo‘shiqlar” kabi bir qancha loyihalardagi chiqishlari bilan el nazariga tushgan. Xonandalikda ham bir qancha taronalari bilan o‘z muxlislarini topgan. Dildora Qayumova 2008-yilda olamdan o‘tgan. Uning bir nafar o‘g‘il farzandi bor.
Kontrabandachilar qurboniga aylangan Radius 21
Radius 21 nomi bilan mashhurlikka erishgan reper Shahzod G‘ulomov o‘n bir yil oldin 29 yoshida avtohalokat sababli olamdan o‘tgan.
U 1981-yil 10-oktabrda Bo‘ka shahrida dunyoga kelgan. Bolaligidan gitara chalish, kitob o‘qish va she’r yozishga juda qiziquvchan bo‘lgan. Maktab va texnikumni tamomlagach, hozirgi O‘zbekiston davlat san’at va madaniyat institutining ommaviy bayramlar rejissorligi fakultetida o‘qiydi. Oliy ta’lim muassasasini bitirganidan keyin xususiy telekanallarning birida ikki yil davomida boshlovchi va rejissor sifatida faoliyat yuritadi. Uning “Radius 21” nomli ko‘rsatuvi tez orada tomoshabinlar e’tiborini qozonadi.
Shu tariqa qo‘shiq aytishga bo‘lgan ishtiyoq uni san’at sohasiga yetaklaydi. Bir qator musiqa yo‘nalishida ijod qilgan xonandaning rep yo‘nalishidagi qo‘shiqlari yoshlar orasida keng ommalashadi. Uning “Akfa media” prodyusserlik markazida ijod qilgan davrida, ya’ni 2006—2008-yillarda hamda keyinchalik yaratgan “Dubay”, “Unutolmadim”, “Monolog”, “Har kun”, “Tungi kapalak” singari ko‘plab taronalari haligacha tinglovchilarini yo‘qotmay kelmoqda. Shahzod G‘ulomov “Sevgi fazosi”, “Onaizor”, “Boyvachcha” kabi filmlarda suratga tushgan.
Marhum san’atkorning ukasi Bekzod G‘ulomov akasi 2010-yilning 12-sentabrida Piskent shahri postiga yaqin joyda Matiz rusumli mashinasida oilasi bilan falokatga uchraganini aytib o‘tgan. Ularga qarama-qarshi yo‘nalishdan esa kontrabanda mahsulotlarini postdan olib qochayotganlar kelib urilgan. Shahzod G‘ulomov avtohalokat bo‘lgan vaqtda, voqea joyining o‘zida olamdan o‘tgan, 3,5 oylik farzandi Beksulton ertasi kuni vafot etgan. Beksulton xonandaning yolg‘iz farzandi edi.
Piyodalar o‘tish joyidagi baxtsiz hodisa
“Oyijon” filmidagi bosh roli bilan tanilgan ijodkor Farangiz Rejametova (Jamolxonova) 2018-yilda avtohalokat oqibatida vafot etgan. U endigina 25 yoshni qarshilagan edi.
U 1993-yilda san’atkorlar oilasida tug‘ilgan. Uning bobosi — O‘zbekiston SSRda xizmat ko‘rsatgan artist To‘g‘on Rejametov, buvisi — O‘zbekiston xalq artisti Shirin Azizova kino va teatrdagi yuzlab rollari orqali o‘zbek san’ati rivojiga hissa qo‘shgan. Onasi — O‘zbekistonda xizmat ko‘rsatgan artist Fotima Rejametova ham betakror ijrolari orqali tomoshabinlar ko‘nglidan joy olgan. Farangiz Rejametova “Sehrli qalpoqcha”, “Uy bekasi” kabi o‘nlab kino va seriallardagi ijrolari bilan ham o‘z muxlislarini topgan.
O‘zbekiston Davlat jahon tillari universiteti xalqaro jurnalistika fakulteti bitiruvchisi hisoblangan 25 yoshli Farangiz Rejametovani 2018-yil 20-iyul kuni soat 21:15 atrofida Abdulla Qodiriy va Mahatma Gandi chorrahasidagi piyodalar o‘tish joyida Mercedes-Benz mashinasi urib ketgan. Haydovchi jabrlanuvchini kasalxonaga olib borgan, ammo aktrisa yo‘lda hayotdan ko‘z yumgan.
Operatsiyaga kirib, omon chiqmagan vayner
Mittivine kulgi jamoasi asoschisi Farhod Mannopovning o‘limi uning muxlislari qalbini larzaga keltirdi. U endigina 27 yoshni qarshilagan edi. U xususiy klinikalardan biriga burun shaklining qiyshayishi va olgan jarohati sabab murojaat qilgan. Operasiya paytida uning yuragi urishdan to‘xtagan.
Farhod Mannopov otasiz, kamtarona oilada ulg‘ayganini yashirmasdi. U vaynerlik faoliyatini boshlashdan avval o‘qish bilan birga, ofisiantlik ham qilgan. 2020-yili yaqin do‘sti Ulug‘bek Shodibekov bilan hamkorlikda vaynerlik faoliyatini boshlagandi.
Uning o‘limi bilan bog‘liq xabar yashin tezligida tarqaldi. Do‘sti Ulug‘bek Shodibekov o‘z intervyusida Farhod Mannopovning o‘lim tafsilotlari haqida so‘zlab bergandi.
