AQSH sobiq prezidenti Donald Tramp va uning oilasi u lavozimda bo‘lgan davrda xorijiy davlatlar hukumatlaridan olgan umumiy qiymati taxminan 291 ming dollarlik yuzdan ortiq sovg‘alar haqida hisobot bermagan. Bu haqda AQSH Kongressi Vakillar Palatasining nazorat bo‘yicha qo‘mitasidan demokratlar e’lon qilgan hujjatda aytiladi.
Hujjatga ko‘ra, Trampning ro‘yxatdan o‘tmagan sovg‘alari orasida O‘zbekiston prezidenti Shavkat Mirziyoyev tomonidan hadya qilingan bahosi 12 ming dollargacha bo‘lgan ipak gilam, Yaponiya sobiq bosh vaziri Sindzo Abening bahosi 3 755 dollargacha bo‘lgan oltin golf to‘plari bor. Trampning kuyovi, tadbirkor Jared Kushner esa Saudiya shahzodasi Muhammad bin Salmondan bahosi 24 ming dollargacha bo‘lgan xanjar va 8 800 dollarlik ikkita qilich to‘plamini olgan.
Bundan tashqari Tramp Salvador prezidenti Nayiba Bukeledan o‘zining real o‘lchamda chizilgan portretini ham olgan, baʼzi maʼlumotlarga ko‘ra, surat Trampning shaxsiy mulki sifatida Floridadagi sobiq AQSH prezidenti qarorgohiga yuborilgan bo‘lishi mumkin, deydi kongressmenlar.
Ularning so‘zlariga ko‘ra, Tramp va yaqinlari Amerika qonunlarida belgilangan me’yordan qimmatroq sovg‘alarni qabul qilgan, bu haqda xabar bermagan va nihoyat, qoidaga ko‘ra, davlat hisobida saqlanishi kerak bo‘lgan sovg‘alarni o‘zlashtirib olgan.
Xorijiy sovg‘alar va bezaklar to‘g‘risidagi qonun prezident va federal amaldorlarga bahosi belgilangan qiymatdan yuqori bo‘lgan chet el sovg‘alarini o‘zida saqlashni taqiqlaydi, hozirda bu qiymat — 415 dollarga teng.
Izoh (0)