Ukraina Rossiya bilan 1993-yil sentabr oyida Yaltada tuzilgan strategik raketa komplekslariga texnik xizmat ko‘rsatish bo‘yicha kelishuvni bekor qildi. Tegishli farmonni Ukraina prezidenti Vladimir Zelenskiy imzoladi, hujjat uning saytida e’lon qilindi.
“Ukraina va Rossiya Federatsiyasi o‘rtasida Strategik kuchlarning strategik raketa komplekslari ishlashi ustidan kafolat va mualliflik nazoratini amalga oshirish tartibi to‘g‘risidagi kelishuv bekor qilinsin”, — deyiladi xabarda.
Ukraina Tashqi ishlar vazirligi zimmasiga Rossiya tomonini ushbu kelishuvning bekor qilingani haqida xabardor qilish topshirildi.
Bundan tashqari, Kiyev 1993-yil 24-dekabrda Ashxobodda tuzilgan Mustaqil Davlatlar Hamdo‘stligi mamlakatlari ichki ishlar organlari xodimlarini pensiya taʼminoti va davlat sug‘urtasi bilan ta’minlash tartibi to‘g‘risidagi shartnomadan ham chiqdi.
Ushbu hujjatga ko‘ra, MDH mamlakatlari ichki organlari xodimlarining Sovet Ittifoqi davrida ittifoq organlaridagi xizmati ish stajiga o‘tar edi. Ukraina Tashqi ishlar vazirligi ushbu kelishuvning boshqa tomonlarini Kiyevning undan chiqishi haqida xabardor qilishi kerak.
2022-yilning 24-fevralida Zelenskiy Rossiya bilan diplomatik munosabatlarni uzganini eʼlon qilgandi. Istiqbolli boshqaruv qarorlari markazi ekspertlarining hisob-kitoblariga ko‘ra, o‘sha paytda Kiyev va Moskva o‘rtasida postsovet davrida imzolangan 23 ta kelishuv bor edi.
Izoh (0)