Turkiya Finlyandiyaning NATOga arizasini tasdiqlash jarayonini boshladi. Bu masala Turkiya parlamentida ko‘rib chiqiladi, deb ma’lum qildi Turkiya prezidenti Rajab Toyyib Erdo‘g‘on. U Anqara har doim NATOning “ochiq eshiklar” siyosatini qo‘llab-quvvatlab kelganini ta’kidladi.
Turkiya rahbarining so‘zlariga ko‘ra, Finlyandiya Anqaraning xavfsizlik muammolarini hal qilish bo‘yicha “samimiy va aniq qadamlarni” tashlagan.
“NATOga a’zolik arizalarini alohida-alohida ko‘rib chiqish to‘g‘risidagi qaror Finlyandiya terrorchilar aksiyalaridan holi ekani sababli qabul qilindi, Shvetsiya haqida bunday deb bo‘lmaydi”, — dedi Erdo‘g‘on Anqarada finlyandiyalik hamkasbi Sauli Niiniste bilan qo‘shma matbuot anjumanida.
Erdo‘g‘on Finlyandiyaning NATOga kirishi haqidagi arizasi Turkiyada may oyida bo‘ladigan saylovlar oldidan parlament tomonidan ma’qullanishiga umid bildirdi. “Ishonchim komilki, Finlyandiya NATO safida global xavfsizlik va barqarorlikka katta hissa qo‘shadi”, — dedi u.
Siyosatchi, shuningdek, Turkiya Anqaraning Yevropa Ittifoqiga to‘laqonli aʼzolikka nomzodini qo‘llab-quvvatlash masalasida Finlyandiya pozitsiyasini muhim deb bilishini taʼkidladi.
Turkiya prezidenti Shvetsiyaning alyansga qo‘shilish haqidagi arizasiga to‘xtalar ekan, Stokgolm bilan NATOga ariza berish bo‘yicha muzokaralar alyans tamoyillari nuqtayi nazaridan va Anqaraning terrorizmga qarshi kurash mavzusiga munosabatini hisobga olgan holda davom etishini aytdi.
“Anqara Stokgolmga 120 nafar terrorchi ro‘yxatini topshirgan. Bu jinoyatchilar Turkiyaga ekstraditsiya qilinmasdan turib, NATOga a’zolik arizasiga ijobiy munosabat bo‘lishi mumkin emas. Terrorizmga qarshi kurash masalasi — Turkiya uchun ‘qizil chiziq’. Anqaraning Stokgolm arizasiga munosabatini Shvetsiya tomonidan tashlanadigan aniq qadamlar belgilaydi”, — deb tushuntirdi Erdo‘g‘on.
Shvetsiya va Finlyandiya NATOga a’zo bo‘lish uchun birgalikda ariza bergan
2022-yilning may oyida Shvetsiya va Finlyandiya NATOga a’zo bo‘lish uchun rasmiy ariza topshirgan edi. Bungacha har ikki davlat harbiy betaraflik siyosatiga amal qilgan. Alyansga qo‘shilish uchun ariza berish to‘g‘risidagi qaror Rossiyaning Ukrainadagi bosqini fonida qabul qilingan.
Shvetsiya va Finlyandiyaning NATOga a’zo bo‘lishi uchun alyansning barcha a’zolari ularning arizalarini qo‘llab-quvvatlashlari kerak. Ittifoqning 30 a’zosidan faqat Vengriya va Turkiya arizalarni ratifikatsiya qilmagan. Anqara ayni paytda ikki davlatga o‘z hududidagi kurd guruhlarini qo‘llab-quvvatlashni to‘xtatish talabini ilgari surdi. Turkiya rasmiylari, shuningdek, Shvetsiyadan “terrorchilikda gumonlanuvchilarni” Anqaraga ekstraditsiya qilishni talab qildi. Keyinchalik Turkiya Shvetsiya bu talablarni bajarmaganini bir necha bor ta’kidladi.
Uch davlat o‘rtasidagi muzokaralar yanvar oyida Stokgolmda Qur’onni yoqish aksiyasidan so‘ng Anqara tomonidan to‘xtatilgan edi. 9-mart kuni muzokaralar qayta boshlandi.
Izoh (0)