Chexiyaning yangi prezidenti Pyotr Pavel saylovoldi kampaniyasida homiylar to‘g‘risida yetarlicha maʼlumot bermagani uchun 60 ming chex kroni (qariyb 2,7 ming dollar) miqdorida jarimaga tortildi, deb xabar bermoqda Chexiya telekanali.
“Prezident Pavel Siyosiy partiyalarning iqtisodiy faoliyatini nazorat qilish boshqarmasi tomonidan rekord darajadagi 60 ming kron jarimaga tortildi. Jarima prezidentlik kampaniyasida homiylar haqida to‘liq bo‘lmagan maʼlumotlar uchun kiritildi. Buni jurnalistlarga ushbu idora xodimi Yan Outli tasdiqladi”, — deyiladi xabarda.
Outlining aytishicha, Pavelning saylovoldi jamg‘armasi homiylaridan ayrimlari to‘g‘risida ma’lumotlar, masalan, ularning yashash joyi va tug‘ilgan sanalari haqida ma’lumotlarning yetishmasligi jarimaga sabab bo‘lgan, chunki bu hujjatlarda eng ko‘p uchragan kamchilik edi.
“Agar sizda 6 000 homiy bo‘lsa va ularning barchasi manzili va tug‘ilgan sanasi kabi maʼlumotlarni taqdim etishi kerak bo‘lsa-yu, lekin ayrimlari maʼlumot bermagan bo‘lsa, bizda o‘sha odamlardan bu ma’lumotlarni olish imkoni yo‘q”, — deya Pavelning Polshaga safari chog‘ida jurnalistlar bilan suhbatda jarimani izohlagan.
“Menimcha, bularning barchasi tushunarli, menda hech qanday muammo yo‘q, chunki ba’zan shunaqasi ham bo‘lib turadi”, — deydi 13-mart kuni jarimani to‘lagan Chexiya prezidenti.
Outlining so‘zlariga ko‘ra, uning boshqarmasi jismoniy shaxsga birinchi marta bunday katta miqdorda jarima solmoqda, odatda, faqat yuridik shaxslarga bu miqdorda jarima solingan.
Izoh (0)