“Daryo” nashri 16-martda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Rossiyaga qarshi hujum boshlanish arafasida
Ukraina avvaldan aytib kelingan bahorgi qarshi hujumga tayyorgarlikni boshladi. Ayni paytda AQSH va boshqa g’arb davlatlari Ukrainaga yordam berishga e’tibor qaratgan.
Politico qayd etishicha, Ukrainaga G‘arbning yuzlab tanklari va zirhli texnikalari, snaryadlar, ko‘priklar qurishga mo‘ljallangan maxsus texnikalar yuborilmoqda.
Bundan tashqari, Ukraina armiyasining 600 nafar harbiysi yaqinda tibbiy yordam ko‘rsatish, o‘t ochish, jangovar zirhli mashinalarni boshqarish bo‘yicha mashg‘ulotlarni yakunladi.
Qarshi hujum may oyida boshlanishi mumkin ammo Kiyev hali strategiya borasida bir qarorga kelmagan. Tahlilga ko‘ra unda ikkita variant bor. Birinchisi — Xerson orqali Qrimga siljish, ikkinchisi — shimoliy pozitsiyasidan sharqqa siljish.
Rossiya Dnepr daryosining sharqiy qirg‘og‘ida o‘z mudofaasiga mustahkam o‘rnashib olgan. Ikkinchi variant ehtimoli ko‘proq, demoqda rasmiylar
Ukraina qanday qurollar bilan ta’minlanadi
Ayni vaziyatda Rossiyaning urushni cho‘zishiga yo‘l qo‘ymaslik uchun AQSH Mudofaa vaziri Kiyev ittifoqchilarini Ukrainaga qurol yetkazib berishni tezlashtirishga chaqirdi.
Xususan, Shvetsiya Ukrainaga 10 ta Leopard tanki, Norvegiya esa AQSH bilan birgalikda Kiyevga ikkita NASAMS zenit raketalari tizimini topshiradi.
Hozirga kelib bu borada Rossiya Eron va Shimoliy Koreyaga tayanishga majbur bo‘lmoqda, chunki rus armiyasining o'zi Ikkinchi jahon urushi qurollaridan foydalanishiga to‘g‘ri kelyapti.
Rossiya esa Eron va Shimoliy Koreyadan qurollar yetkazib berilishi haqidagi xabarlarni tan olmaydi.
Eronda qizlar zaharlanmoqda. Hodisa aybdorlari kim?
Eronda mamlakat bo‘ylab o‘quvchi qizlarning zaharlanishi mart oyida yanada kuchaydi. Eron hukumati bu hodisalarga aloqador 110 kishini hibsga olgan. Hozirda bu harakatlar "qizlarning maktabga borishiga to‘sqinlik" deb taxmin qilinmoqda.
Dastlabki zaharlanish holatlari 2022-yil noyabrda Tehron yaqinidagi Qum shahrida qayd etilgan. O‘shanda 18 nafar o‘quvchi shifoxonaga yetkazilgan. Ulardan biri oyoqlarini his qilmayotganini aytgan, boshqalari nafas qisilishidan shikoyat qilgan. Shundan so‘ng ayrim ota-onalar farzandlarini maktabga yuborishdan bosh tortgan.
Qum voqealaridan keyin, bir necha hafta ichida shunday holatlar, jumladan Tehron va Borujerd shahrida qayd etilgan, 2023-yil mart oyi boshidan zaharlanishlar soni keskin oshdi. 6-martga kelib, mamlakatdagi 31 viloyatning 23 tasidan bunday hodisalar haqida xabarlar kelib tushdi.
Avvalroq Guardian nashri, qizlar kuzda hukumatga qarshi bo‘lib o‘tgan namoyishlarda qatnashgani uchun zaharlanganini yozdi
Eron prezidenti Ibrohim Raisiy esa yuzlab o‘quvchi qizlarning zaharlanishida Tehron dushmanlarini ayblamoqda
O‘zbekistonda Navro‘z bayrami, uyga qanday ketamiz?
O‘zbekiston aholisi Navro‘z bayramida ketma-ket besh kun: 18, 19, 20, 21, 22-mart kunlari dam oladi. Ma’lumki Markaziy Osiyo davlatlari aholisi ushbu bayramni birdek nishonlaydi.
Ma’lumotlarga ko‘ra, qo‘shnilarimizdan qozog‘istonliklar Navro'zda ikki kun dam oladi. Tojikistonda esa Navro‘z arafasi aholi ketma-ket 8 kun dam oladi.
Demak, Navro‘z bayrami arafasida 5 kun dam olamiz va albatta oldimizda turgan eng muhim muammolardan biri uyga qaytish uchun poyezdga chiptaning tugab qolishi.
Muammoga yechim sifatida “O‘zbekiston temir yo‘llari” matbuot xizmati viloyatlarga qo‘shimcha poyezdlar qatnovi yo‘lga qo‘yilishini xabar qildi.
Uning batafsil ma'lumotlari:
- 17-martdan 22-martga qadar Samarqand—Toshkent—Samarqand yo‘nalishida yuqori tezlikda harakatlanuvchi 767/768-sonli “Afrosiyob” elektropoyezdi;
- 20-, 21-mart kunlari Toshkent—Qarshi—Toshkent yo‘nalishida yuqori tezlikda harakatlanuvchi 780/779-sonli “Afrosiyob” elektropoyezdi;
- 19-, 21-mart kunlari Toshkent—Urganch—Toshkent yo‘nalishida harakatlanuvchi 156f/155f-sonli yo‘lovchi poyezdlar qatnovi yo‘lga qo‘yildi.
Izoh (0)