2022-yilda Xitoyning bir qator kompaniyalari Rossiyaga harbiy maqsadlarda ishlatilishi mumkin bo‘lgan qurol-aslaha, jumladan, avtomatlar, dron qismlari va zirhli nimchalarni jo‘natgan. Bu haqda Politico ImportGenius agregatorining bojxona ma’lumotlariga tayanib yozmoqda.
Qurollar 2022-yilning iyunidan dekabrigacha yetkazib berilgan. Ta’minotchilar orasida Xitoy hukumatiga aloqador kamida bitta kompaniya bor edi — Xitoyning eng yirik mudofaa pudratchilaridan biri bo‘lgan China North Industries Group Corporation Limited. Iyun oyida u Rossiyaning mamlakat Mudofaa vazirligi bilan hamkorlik qiladigan “Texkrim” kompaniyasiga mingta CQ-A miltiqlarini yuborgan, deb yozadi nashr.
Yana bir kompaniya — Da-Jiang Innovations Science & Technology Co. (DJI) — noyabr va dekabr oylarida Birlashgan Arab Amirliklari orqali Rossiyaning kichik distribyutoriga dronlar uchun ehtiyot qismlari — akkumulyatorlar va kameralar yuborgan. Dronlar uchun jami 12 partiya ehtiyot qismlari yetkazib berilgan.
Bundan tashqari, 2022-yil oxirida Turkiya orqali Rossiyaga Xitoyning qiymati qariyb 10 million dollarlik 800 tonnadan ortiq o‘q o‘tkazmaydigan jiletlari olib kirilgan.
Politico maʼlumotlariga ko‘ra, jo‘natilgan yuklarning hajmi va xarakteri Pekin Moskvaga harbiy yordamni maqsadli yetkazib berayotganini ko‘rsatmaydi, biroq bu tovarlar harbiy harakatlarda qo‘llanilishi mumkin bo‘lgan ikki maqsadli mahsulotlar ekani aniq. Nashr Ukrainadagi urushda Xitoy miltiqlardan foydalanilganiga oid dalillarni topa olmadi, ammo jang maydonida Xitoy dronlarini ko‘rishgan.
Fevral oyida AQSH davlat kotibi Entoni Blinken Xitoy Rossiyaga noharbiy yordam ko‘rsatayotganini, biroq qurol yetkazib berish masalasini ham ko‘rib chiqayotganini aytgandi. O‘z navbatida, Xitoy Ukrainadagi urushga aynan Amerika qurol-yarog‘lari sabab bo‘layotganini aytib, AQSHni aybladi.
Germaniyaning Der Spiegel nashri rossiyalik harbiylar Xitoyning dron ishlab chiqaruvchi kompaniyasi bilan kamikadze dronlarini yetkazib berish bo‘yicha muzokaralar olib borayotgani haqida xabar berdi. Nashr maʼlumotlariga ko‘ra, 100 ta dronning birinchi partiyasi Rossiyaga 2023-yil aprelida yetkazilishi mumkin. Urushni o‘rganish bo‘yicha Amerika instituti ekspertlari Xitoy Belarus yordamida G‘arb sanksiyalarini chetlab o‘tishga umid qilayotganini xabar qildi.
Izoh (0)