“To‘rt oyda birgina Dehqonobodda 9 ta yangi ko‘prik qurildi”. Shavkat Mirziyoyev qashqadaryoliklarning asosiy murojaati ko‘prik qurilishi bilan bog‘liq ekanini aytgach, hududda ishlar jadallashdi

Prezident Shavkat Mirziyoyev Qashqadaryo viloyatiga tashriflarining birida unga murojaat qilayotgan qashqadaryoliklarning aksariyati “ko‘prik qurib bering, prezident buva” deb yozishini aytib, viloyatdagi dolzarb muammolardan biri ko‘prik qurilishi bilan bog‘liq masala ekanini maʼlum qilgandi. Dehqonobod tumani hokimi Zoir Aliqulovning “Daryo”ga maʼlumot berishicha, davlat rahbarining bu masalaga eʼtibori birgina Dehqonobodda to‘rt oyda 9 ta yangi ko‘prik qurilishiga sabab bo‘ldi.

“Prezidentimiz topshiriqlari bilan oxirgi besh-olti yilda 73 ta yangi ko‘prik qurdik. Shundan 9 tasi so‘nggi to‘rt oy davomida qurilib, Navro‘z bayrami arafasida foydalanishga topshirildi. Yana 5 ta ko‘prik barpo qilinishi rejalashtirilgan. Bu ko‘priklar tumanimizning ‘Beliboyli’, ‘Boshchorbog’’, ‘Boyqo‘rg‘on’, ‘Chilgaz’ hamda ‘Torqopchug‘ay’ mahallalarida qad rostlaydi”, — dedi Dehqonobod tuman hokimi Zoir Aliqulov.

Aholining ko‘prikka bo‘lgan ehtiyojini qondirish borasidagi ijobiy ishlar odamlarni ham quvontirmoqda.

“Kuchli yog‘ingarchilik oqibatida uyimiz yonidagi daryoning qirg‘oqlarini bog‘lab turadigan ko‘prikni sel suvlari yuvib ketdi. Bu joyga yana ko‘prik quriladi degan fikr xayolimizga ham kelmagandi. Mana oradan ko‘p vaqt o‘tmasdan muhtaram yurtboshimiz tashabbuslari bilan yangi, zamonaviy, mustahkam ko‘prik qad rostladi. Biz buning uchun prezidentimizga, viloyat va tuman hokimlariga chuqur minnatdorlik bildiramiz”, — deydi dehqonobodlik nuroniylardan biri.