Президент Шавкат Мирзиёев Қашқадарё вилоятига ташрифларининг бирида унга мурожаат қилаётган қашқадарёликларнинг аксарияти “кўприк қуриб беринг, президент бува” деб ёзишини айтиб, вилоятдаги долзарб муаммолардан бири кўприк қурилиши билан боғлиқ масала эканини маълум қилганди. Деҳқонобод тумани ҳокими Зоир Алиқуловнинг “Дарё”га маълумот беришича, давлат раҳбарининг бу масалага эътибори биргина Деҳқонободда тўрт ойда 9 та янги кўприк қурилишига сабаб бўлди.
“Президентимиз топшириқлари билан охирги беш-олти йилда 73 та янги кўприк қурдик. Шундан 9 таси сўнгги тўрт ой давомида қурилиб, Наврўз байрами арафасида фойдаланишга топширилди. Яна 5 та кўприк барпо қилиниши режалаштирилган. Бу кўприклар туманимизнинг ‘Белибойли’, ‘Бошчорбоғ’, ‘Бойқўрғон’, ‘Чилгаз’ ҳамда ‘Торқопчуғай’ маҳаллаларида қад ростлайди”, — деди Деҳқонобод туман ҳокими Зоир Алиқулов.
Аҳолининг кўприкка бўлган эҳтиёжини қондириш борасидаги ижобий ишлар одамларни ҳам қувонтирмоқда.
“Кучли ёғингарчилик оқибатида уйимиз ёнидаги дарёнинг қирғоқларини боғлаб турадиган кўприкни сел сувлари ювиб кетди. Бу жойга яна кўприк қурилади деган фикр хаёлимизга ҳам келмаганди. Мана, орадан кўп вақт ўтмасдан муҳтарам юртбошимиз ташаббуслари билан янги, замонавий, мустаҳкам кўприк қад ростлади. Биз бунинг учун президентимизга, вилоят ва туман ҳокимларига чуқур миннатдорлик билдирамиз”, — дейди деҳқонободлик нуронийлардан бири.
Изоҳ (0)