O‘zbekistonda 18-mart kuni “Tashabbusli budjet” loyihasining navbatdagi mavsumi boshlanadi va ovoz berish jarayonlariga start beriladi. Bu haqda 16-mart kuni AOKAda o‘tkazilgan matbuot anjumanida Iqtisodiyot va moliya vazirligi mutasaddilari maʼlum qildi, deya xabar bermoqda “Daryo” muxbiri.
Maʼlum qilinishicha, “Tashabbusli budjet” jarayonlari uch bosqichli kalendar rejaga asosan amalga oshiriladi. Birinchi bosqichda, fuqarolar o‘z takliflarini (batafsil ko‘rinishda) qoldiradi (6-fevraldan 25-fevralgacha).
Ikkinchi bosqichda, aholi tomonidan bildirilgan takliflar moderatsiya jarayonidan o‘tkaziladi (26-fevraldan 17-martgacha).
So‘ngi bosqichda, moderatsiyadan o‘tkazilgan takliflar ovoz berish jarayoniga o‘tkaziladi (18-martdan 7-aprelga qadar).
Tadbirda “Ochiq budjet” axborot portali orqali ovoz berish tizimini takomillashtirishga qaratilgan yangi mexanizm ishga tushirilgani aytildi. 2023-yilgi tuman va shahar budjetlarida tashabbusli byudjet jarayonlari uchun jami 2 trillion so‘m mablag‘ yo‘naltirish ko‘zda tutilgan bo‘lib, shundan 1 trillion so‘mi birinchi mavsumda ajratiladi.
Bundan tashqari, 2023-yil boshiga mahalliy budjetlarda shakllangan erkin qoldiq mablag‘larining 30 foizi mahalliy hokimliklar tomonidan Fuqarolar tashabbusi jamg‘armasiga yo‘naltiriladi.
Dastlabki hisob kitoblarga ko‘ra, shunda birinchi mavsum uchun Fuqarolar tashabbusi jamg‘armalarida jami 1,7 trillion so‘m mablag‘ shakllanishi ko‘zda tutilmoqda.
Vazirlik departamenti direktori Sherzod Muhamedovning aytishicha, jamoatchilik tomonidan bildirilgan takliflarni moliyalashtirish uchun 2023-yilda budjetdan jami 8 trillion so‘m mablag‘lar yo‘naltirilishi mo‘ljallangan.
“Shundan 2 trillion so‘mi “Tashabbusli budjet” jarayonlari uchun tuman va shahar budjetlaridan, 320 milliard so‘mi “Mening yo‘lim” loyihasi doirasida tuman va shahar budjetlaridan, 4 trillion so‘mi “Obod qishloq” va “Obod mahalla” dasturlarini jamoatchilik fikri asosida shakllantirish rejalashtirilgan. Shu bilan birga, joriy yilda mahalliy budjetlar qo‘shimcha manbalarining 30 foizi hisobiga 1,7 trillion so‘m miqdoridagi mablag‘lar Fuqarolar tashabbusi jamg‘armalariga yo‘naltirilishi prognoz qilingan”, – dedi vazirlik rasmiysi.
Vazirlik bo‘lim boshlig‘i Azimjon Hasanovning taʼkidlashicha, “Tashabbusli byudjet” loyihasi bo‘yicha joriy yil birinchi mavsumi doirasida taklif kiritish jarayonlari yakunlandi.
“Hozirda tuman (shahar) ishchi komissiyalari tomonidan moderatsiya jarayonlari amalga oshirilib kelinmoqda. Shu bilan birga, birinchi mavsum doirasida fuqarolar tomonidan jami 55,9 mingta loyihalar kelib tushgan. Hududlar kesimida eng ko‘p kelib tushgan loyihalar Surxondaryo, Qashqadaryo, Xorazm viloyatlari va Toshkent shahri hissasiga to‘g‘ri keladi. Sohalar kesimida eng ko‘p ilgari surilgan loyihalar – hududiy ichki yo‘llarni taʼmirlash yo‘nalishi bo‘yicha bo‘ldi. Fuqarolar tomonidan ushbu yo‘nalish bo‘yicha jami 14,7 mingta loyihalar ilgari surilgan hamda jami loyihalar soniga nisbatan 26 foizni tashkil etgan”, – dedi mutaxassis.
Shuningdek, umumtaʼlim maktablarini taʼmirlash va jihozlash bo‘yicha 10,3 mingta (18 foiz), ko‘cha chiroqlarini o‘rnatish hamda elektr energiya taʼminoti bilan bog‘liq loyihalar 6,3 mingta (11 foiz), maktabgacha taʼlim tashkilotlarini taʼmirlash va jihozlash bo‘yicha 4,4 mingta (8 foiz) hamda sog‘liqni saqlash tashkilotlarini taʼmirlash va jihozlash bo‘yicha 3,1 mingta (6 foiz) loyihalar ilgari surilgan.
Izoh (0)