O‘zbekiston U-20 terma jamoasi bosh murabbiyi Ravshan Haydarov U-20 Osiyo Kubogi yarim finali doirasida Janubiy Koreyaga qarshi o‘yindagi (0:0, 3:1) g‘alabadan so‘ng o‘z fikrlarini bildirib o‘tdi.
O‘yin haqida
Avvalo, muxlislar, futbolchilar va murabbiylarni finalga chiqqanimiz bilan tabriklayman! Bir-biriga mos, teng kuchli jamoalar to‘qnash kelib, shiddatkor o‘yin ko‘rsatdi. Juda ko‘p vaziyatlar yaratdik. Ammo penaltilar seriyasiga qadar yetib bordik va darvozabonimiz unda o‘zini ko‘rsatdi. O‘yinda bizda ko‘proq vaziyatlar bo‘ldi. G‘alaba bizga haqli ravishda nasib qildi. Matonat ko‘rsatgani uchun yigitlarga rahmat aytaman va ular bilan faxrlanaman.
Zaxiradan tushgan futbolchilar o‘yinga qo‘shib ketolmagani borasida
Ular ishonchni oqlamadi deb o‘ylamayman. Aynan ular evaziga o‘yinni qo‘lga oldik. Zaxiradan tushganlar o‘yinni kuchaytirdi va ularda talaygina imkoniyatlar yuzaga keldi. Ular o‘yinga kirishib keta olmadi deb o‘ylamayman. Ha, Jo‘raboyev biroz qiynaldi, keyin uni sariq kartochka olgani uchun almashtirdim. Biz o‘zgarishlarni to‘g‘ri amalga oshirdik deb o‘ylayman.
Xoldorxonov va Asqarovning jarohati borasida
Ular bilan tibbiy xodimlar shug‘ullanmoqda. Tezroq tiklashga harakat qilishadi, hozir bir nima deb bo‘lmaydi. Ertaga ko‘ramiz. Agar ular tiklansa va jarohat xalaqit qilmasa, ular finalda o‘ynaydi.
Muxlislar bosimi haqida
Muxlislarga rahmat. To‘la muxlislarga ega stadionda o‘ynash faxrlanarli. Albatta, qiyinchiligi ham bor, bosim bo‘ladi. Urugvay kabi davlatlarga borib, bu bo‘yicha ruhan ishlagandik va urg‘u bergandik. Bir tarafdan, bu mas’uliyat bag‘ishlaydi. Biz bunday atmosferadan kuch olish va zavqlanishni o‘rganishimiz kerak.
Chorak va yarim finaldagi 120 daqiqalik o‘yinlar finalga ta’sir o‘tkazishi borasida
Albatta, bunga tayyorgarlik ko‘rganmiz. Kuch yo‘qotilyapti, albatta. Lekin, o‘ylaymanki, tiklanib olamiz. Kiyinish xonasida bayramni to‘xtatdik. Tiklanish ishlari davom etadi. Yigitlar yosh, ularga mashg‘ulot jarayonida hammasini to‘g‘ri tushuntirib boryapmiz. Jismoniy tayyorgarlik bo‘yicha murabbiyimizga rahmat. Oxirgi ikki o‘yinda raqiblardan kam joyimiz ko‘rinmadi. Biz har taraflama – ham jismonan, ham taktik jihatdan kuchli bo‘lishimiz kerak.
U-20 JCH—2023 dagi ishtirok va jamoadagi kelajagi haqida
Qaysi jamoa bo‘lmasin, ishlashda davom etamiz. Hozir butun vujudim bilan shu jamoaga e’tiborimni qaratganman. Ertaga nima bo‘lishini Xudo biladi. Oxirgi 10 yildagi faoliyatimdan kelib chiqsak, o‘zimga loyiq jamoadaman deb o‘ylayman. Bu yosh toifasidagi futbolchilarni asosiy milliy terma jamoaga yetishtirib berishimiz lozim. Jahon chempionatlari va xalqaro turnirlarda qatnashib, futbolchilarning va o‘zbek futbolining saviyasi o‘sadi. Bu yoshlar o‘sishi uchun katta bosqich bo‘ladi. Avval U-23, keyin terma jamoaga yo‘l oladi. Hozirgi maqsadimiz – tizimli ishlashni yo‘lga qo‘yish.
Ravshan Haydarov, O‘zbekiston U-20 terma jamoasi bosh murabbiyi
Izoh (0)