Ўзбекистон U-20 терма жамоаси бош мураббийи Равшан Ҳайдаров U-20 Осиё Кубоги ярим финали доирасида Жанубий Кореяга қарши ўйиндаги (0:0, 3:1) ғалабадан сўнг ўз фикрларини билдириб ўтди.
Ўйин ҳақида
Аввало, мухлислар, футболчилар ва мураббийларни финалга чиққанимиз билан табриклайман! Бир-бирига мос, тенг кучли жамоалар тўқнаш келиб, шиддаткор ўйин кўрсатди. Жуда кўп вазиятлар яратдик. Аммо пенальтилар сериясига қадар етиб бордик ва дарвозабонимиз унда ўзини кўрсатди. Ўйинда бизда кўпроқ вазиятлар бўлди. Ғалаба бизга ҳақли равишда насиб қилди. Матонат кўрсатгани учун йигитларга раҳмат айтаман ва улар билан фахрланаман.
Захирадан тушган футболчилар ўйинга қўшиб кетолмагани борасида
Улар ишончни оқламади деб ўйламайман. Айнан улар эвазига ўйинни қўлга олдик. Захирадан тушганлар ўйинни кучайтирди ва уларда талайгина имкониятлар юзага келди. Улар ўйинга киришиб кета олмади деб ўйламайман. Ҳа, Жўрабоев бироз қийналди, кейин уни сариқ карточка олгани учун алмаштирдим. Биз ўзгаришларни тўғри амалга оширдик деб ўйлайман.
Холдорхонов ва Асқаровнинг жароҳати борасида
Улар билан тиббий ходимлар шуғулланмоқда. Тезроқ тиклашга ҳаракат қилишади, ҳозир бир нима деб бўлмайди. Эртага кўрамиз. Агар улар тикланса ва жароҳат халақит қилмаса, улар финалда ўйнайди.
Мухлислар босими ҳақида
Мухлисларга раҳмат. Тўла мухлисларга эга стадионда ўйнаш фахрланарли. Албатта, қийинчилиги ҳам бор, босим бўлади. Уругвай каби давлатларга бориб, бу бўйича руҳан ишлагандик ва урғу бергандик. Бир тарафдан, бу масъулият бағишлайди. Биз бундай атмосферадан куч олиш ва завқланишни ўрганишимиз керак.
Чорак ва ярим финалдаги 120 дақиқалик ўйинлар финалга таъсир ўтказиши борасида
Албатта, бунга тайёргарлик кўрганмиз. Куч йўқотиляпти, албатта. Лекин, ўйлайманки, тикланиб оламиз. Кийиниш хонасида байрамни тўхтатдик. Тикланиш ишлари давом этади. Йигитлар ёш, уларга машғулот жараёнида ҳаммасини тўғри тушунтириб боряпмиз. Жисмоний тайёргарлик бўйича мураббийимизга раҳмат. Охирги икки ўйинда рақиблардан кам жойимиз кўринмади. Биз ҳар тарафлама – ҳам жисмонан, ҳам тактик жиҳатдан кучли бўлишимиз керак.
U-20 ЖЧ—2023 даги иштирок ва жамоадаги келажаги ҳақида
Қайси жамоа бўлмасин, ишлашда давом этамиз. Ҳозир бутун вужудим билан шу жамоага эътиборимни қаратганман. Эртага нима бўлишини Худо билади. Охирги 10 йилдаги фаолиятимдан келиб чиқсак, ўзимга лойиқ жамоадаман деб ўйлайман. Бу ёш тоифасидаги футболчиларни асосий миллий терма жамоага етиштириб беришимиз лозим. Жаҳон чемпионатлари ва халқаро турнирларда қатнашиб, футболчиларнинг ва ўзбек футболининг савияси ўсади. Бу ёшлар ўсиши учун катта босқич бўлади. Аввал У-23, кейин терма жамоага йўл олади. Ҳозирги мақсадимиз – тизимли ишлашни йўлга қўйиш.
Равшан Ҳайдаров, Ўзбекистон U-20 терма жамоаси бош мураббийи
Изоҳ (0)