AQSH prezidenti Jo Bayden o‘zining tashqi siyosati orqali Rossiyani Xitoy bilan ittifoq tuzishga undadi. Bu haqda Amerikaning sobiq prezidenti Donald Tramp Ayova shtatidagi mitingda aytdi.
“Bayden ma’muriyati Rossiyani to‘g‘ridan to‘g‘ri Xitoy qo‘liga tutqazdi. Buni qabul qilish mumkin emas. Bayden aynan shunday qildi. Endi ularda katta va chiroyli ittifoq bor. Ular Rossiyani bevosita Xitoy qo‘liga tutqazdi. Xitoy uchun bu boladan konfetini olib qo‘ygandek bo‘ldi”, — dedi Tramp.
Siyosatchi Bayden aynan qayerda xato qilganiga aniqlik kiritmadi.
Sobiq prezident o‘zini uchinchi jahon urushining oldini olishga qodir bo‘lgan AQSH prezidentligiga yagona nomzod deb atadi.
“Men buni va’da qila oladigan yagona nomzodman. Men uchinchi jahon urushining oldini olaman, chunki ishonchim komil, sizda uchinchi jahon urushi bo‘ladi”, — deya davom etdi Tramp. Siyosatchi bunday mojaro xavfini real deb atadi.
Tramp o‘tgan yilning noyabrida 2024-yilda bo‘lib o‘tadigan navbatdagi prezidentlik saylovlarida ishtirok etish niyatini ma’lum qilgandi. Yanvar oyining oxirida u saylovoldi tashviqotini boshladi.
Qo‘shma Shtatlarning sobiq prezidenti 2020-yilgi saylovlarda o‘zi yutqazgan raqibi Baydenni bir necha bor tanqid qilgan. Ukrainadagi urush va Bayden ma’muriyatining bu mamlakatga nisbatan harakatlari uchinchi jahon urushiga olib kelishi mumkin, deydi u va Oq uyni “ehtiyotkorlikka” chaqiradi. Tramp, shuningdek, agar u AQSH prezidenti bo‘lganida Ukrainadagi inqiroz ro‘y bermasligini ta’kidlaydi.
Izoh (0)