Turkmaniston Ukrainadagi bolalarga dori-darmon, oziq-ovqat va zarur tovarlarni insonparvarlik yordami sifatida yuboradi, deb xabar bermoqda “Neytralniy Turkmanistan” gazetasi.
Tegishli buyruqni Turkmaniston prezidenti Serdar Berdimuhamedov imzolagan. Hujjatda aytilishicha, farmon “turkman xalqining yaxshi qo‘shnichilik va insonparvarlikning azaliy an’analariga” muvofiq imzolangan.
Buyruq Turkmaniston tibbiyot va to‘qimachilik sanoati davlat boshqarmalariga, shuningdek, Sanoatchilar va tadbirkorlar uyushmasiga yo‘llangan.
Turkmaniston mamlakat konstitutsiyasiga muvofiq 1995-yildan beri ijobiy betaraflik siyosatini olib bormoqda. Shu munosabat bilan rasmiy Ashxobod dunyoda, jumladan, Rossiya 2022-yil fevralida “maxsus harbiy operatsiya” boshlagan Ukrainadagi dramatik voqealarga izoh bermayapti.
Oktabr oyida Turkmaniston va Ukraina diplomatik munosabatlari o‘rnatilganining 30 yilligini nishonladi. Berdimuhamedov shu munosabat bilan Ukraina prezidenti Vladimir Zelenskiyga maktub yo‘lladi.
“Davlatlarimiz o‘rtasidagi munosabatlar o‘zaro hurmat, teng huquqlilik va o‘zaro ishonchga asoslangan. Turkmaniston ikki tomonlama aloqalarni kengaytirishdan manfaatdor”, — deya ta’kidlagan Turkmaniston prezidenti o‘z maktubida.
Eziz Boyarov, Ashxobod
Izoh (0)